21 September 2009

ကော်ဖီခွက်တစ်ခွက်၏ ဈာပန


ဟိုတစ်နေ့က ကျနော့်ရဲ့ ကော်ဖီခွက်ကလေး ကွဲသွားတယ်၊ ကျနော်ကော်ဖီထည့်သောက်နေကျ ခွက်ကလေးပါ၊ ပုံမှန်အားဖြင့် ဒီလိုအရာ တွေကို ကျနော်အနေနဲ့ သိပ်ပြီးတော့ တစွဲတလမ်း မရှိလှဘူး၊ ဒါပေမယ့် ဒီခွက်ကလေးကိုတော့ နဲနဲသဘောကျမိတယ်၊ ကျနော်တို့ ဒီနေ့ ခေတ်မှာ အရွယ်စုံ၊ အရောင်စုံ ခွက်တွေကို နေရာတိုင်းမှာ ရနိုင်ပါတယ်၊ ဒီဇိုင်းမျိုးစုံနဲ့ ခွက်အကြီးအသေး အစုံစုံက ကြိုက်တတ်မယ်ဆိုရင် ဖြင့် ယူချင်စရာချည်းပါပဲ၊ ဒါပေမယ့် တော်ရုံနဲ့ ကျနော်ရင်မခုန်ခဲ့ပါဘူး၊

ဒီခွက်လေးကတော့ သူ့ရဲ့ဒီဇိုင်းရိုးရိုးလေးနဲ့ ကျနော့်ကိုဖမ်းစားလိုက်တယ်၊ အုတ်နီခဲရောင် ဗြောင်ဒီဇိုင်းမှာမှ ခွက်ရဲ့နှုတ်ခမ်းမှာ အပ်ချည် ကြိုးနဲ့သီထားသယောင် ငုပ်ချည်ပေါ်ချည် အဖြူလိုင်းကလေးနဲ့...၊ ရိုးဂုဏ်လေးနဲ့ကို ဆန်းနေတဲ့ခွက်ကလေး၊ ဒါပေမယ့် ဒီဇိုင်းထက် ကျနော့်ကိုပိုပြီး ဖမ်းစား လိုက်တာက သူ့ကိုလုပ်ထားတဲ့ ကျောက်မှုန့်အမျိုးအစား...၊ ဟုတ်ပါတယ်၊ ဒီခွက်ကလေးကို sand stone လို့ခေါ် တဲ့ သဲကျောက်အမျိုးအစားနဲ့ လုပ်ထားခဲ့တယ်၊ သဲကျောက်ချည်းသက်သက်တော့ ဟုတ်ဟန်မတူဘူး၊ သဲကျောက်ဘယ်လောက် ရာခိုင်နှုန်းပါသလဲ ဆိုတာ ကျနော်မသိပေမယ့် တွေ့နေကျခွက်တွေလို မဟုတ်လို့ ကျနော်သဘောကျသွားတယ်၊

တကယ်တော့ ဒီခွက်လေးကို ကျနော့်ဖာသာ တွေ့ပြီးဝယ်လာတာတော့ မဟုတ်ပါဘူး၊ ပစ္စည်းဆန်းဆန်းလေးတွေ ရောင်းတဲ့ဆိုင်တစ်ဆိုင် မှာမအိမ်သူက ကျနော့်ကို ပြခဲ့တာ...၊ အဲဒီဆိုင်က မြင်နေကျ ပုံစံတွေကနေ ဖောက်ထွက်လာတဲ့ အရောင်တွေ၊ ဒီဇိုင်းတွေနဲ့ ပန်းကန်၊ ခွက် ယောက်တွေကို ရောင်းတဲ့ဆိုင်ပါ၊ ပို့စ်မော်ဒန် ပန်းကန်ဆိုင်လို့ ဆိုပါတော့လေ၊ ကျနော်က တခါတလေ နဲနဲ နမော်နမဲ့ နိုင်တတ် တော့ “ ကြွေပန်းကန်ဆိုင်ထဲ နွားမောင်းသွင်းလိုက်သလိုပဲ” ဆိုတဲ့ အင်္ဂလိပ်အီဒီယံလို မဖြစ်ရအောင် သတိကြီးစွာထားပြီး ဟိုဒီလျှောက်ကြည့်နေတုန်း အဲဒီ ခွက်ကလေးနဲ့ စ,ပြီး ဆုံစည်းခဲ့တာပေါ့၊ ဆိုခဲ့သလိုပါပဲ...၊ သူ့ရဲ့ ဒီဇိုင်းရယ် သူ့ရဲ့ မြေသားအမျိုးအစားရယ်ကြောင့် ယူဖို့ကျနော်သဘောတူ လိုက်တယ်၊

တကယ်တမ်းမှာက ကျနော်က အဲဒီခွက်နဲ့ နေ့တိုင်းကော်ဖီသောက်တာတော့ မဟုတ်ပါဘူး၊ စနေ တနင်္ဂနွေလို နေ့တွေမှာပဲ သောက်ဖြစ် တယ်၊ ကျန်ရက်တွေက အလုပ်မှာပဲ မနက်စာကော်ဖီသောက်တာကိုး၊ စနေ တနင်္ဂနွေမှာတောင်မှ မနက်တခါပဲ အဲဒီခွက်နဲ့ သောက်လေ့ရှိ ပါတယ်၊ ကျနော်က နေ့တစ်နေ့ရဲ့ ပထမဆုံးကော်ဖီကို ပုံမှန်ကော်ဖီသောက်လေ့ရှိပြီး ကျန်တဲ့အချိန်မှာတော့ အက်စ်ပရက်ဆို (Espresso) ပဲအသောက်များတော့ ခပ်ကြီးကြီးအဲဒီခွက်နဲ့ဆို အက်စ်ပရက်ဆိုက ခွက်အောက်ခြေမှာ မစို့မပို့နဲ့ ဆင့်ပါးစပ် နှမ်းပက်သလိုဖြစ်နေမှာ သေချာတယ်၊ ဒါ့ကြောင့် ကျန်တဲ့ကော်ဖီတွေကို ခွက်အသေးလေးတွေနဲ့ သောက်ပါတယ်၊

အဲဒီလို မနက်တစ်ကြိမ်သာ သောက်ပေမယ့် သူ့အထဲမှာ ကော်ဖီထည့်သောက်ရတိုင်း ကျနော့်စိတ်ထဲ ပုဂံကို ရောက်သွားရသလိုခံစားရ တယ်၊ တိတိပပ ဆစ်ပိုင်းပြောရရင် ပုဂံမှာမှ ရွှေစည်းခုံနဲ့ နန်းဘုရားကို ရောက်သွားရသလိုပဲ၊ စေတီပုထိုးပေါင်း ထောင်နဲ့ချီရှိတဲ့ ပုဂံမှာ သဲကျောက်နဲ့ တည်တာဆိုလို့ လေးဆူထဲရှိပါတယ်၊ အဲဒီအထဲမှာမှ အရောက်များကြတာ ရွှေစည်းခုံနဲ့နန်းဘုရားပါ၊ မနှိုင်းကောင်း မနှိုင်း အပ်ရာ နှိုင်းတာတော့ မဟုတ်ပါဘူး၊ သဲကျောက်နဲ့ လုပ်ထားခဲ့တဲ့ ခွက်ကလေးနဲ့ ကော်ဖီသောက်တိုင်းမှာ ဒီခွက်ကလေးက သဲကျောက်နဲ့ လုပ်ထားတာပါလား ဆိုတဲ့အသိက မိုင်ပေါင်းငါးထောင်ကျော်အဝေးက ချစ်သောပုဂံမြေရဲ့ သဲကျောက်ပုထိုးနှစ်ဆူကို သတိရစေပါတယ်၊ ကော်ဖီပူပူ တကျိုက်က ရင်ခေါင်းထဲမှာ နွေးကနဲ စီးဆင်းသွားတာနဲ့အတူ နှလုံးသားမှာလည်း ဆွတ်ပျံ့တမ်းတစိတ်တွေက နွေးထွေးလာ တတ်စမြဲပါပဲ၊

အဲဒီခွက်ကလေးက ဟိုတစ်နေ့ကတော့ တကယ်ပဲကွဲသွားခဲ့တယ်၊ ကျနော့်ကြောင့်တော့ မဟုတ်ပါဘူး၊ မအိမ်သူက ခွက်တွေထားတဲ့ ဘီဒို ကိုအဖွင့်မှာ သူ့လက်နဲ့တိုက်မိပြီး ကြမ်းပေါ်ကိုကျသွားခဲ့တယ်၊ ခွမ်းကနဲ အသံနဲ့အတူ ကျနော်အတော်လေး စိတ်မကောင်းဖြစ်သွားခဲ့တယ်၊ အတော်လေးလည်း နှမြောသွားမိတယ်၊ ဒါပေမယ့် ဘယ်တတ်နိုင်မလဲ၊ ကွဲသွားခဲ့ပြီပဲ၊ မအိမ်သူလည်း အတော်လေး စိတ်မကောင်းဖြစ် သွားရှာတယ်၊ သူ ပြန်ရှာဝယ်ပေးပါ့မယ်လို့ ပြောတယ်၊ ကျနော် သူ့ကို စိတ်မဆိုးပါဘူး၊ သူဝယ်ပေးခဲ့တဲ့ ခွက်က သူ့ကြောင့်ပဲ ကွဲသွားခဲ့ရ တာ ဘာမှငြိုငြင်စရာ မရှိပါဘူး၊ ပြီးတော့ မတော်တဆဆိုတာ လူတိုင်းပဲ ဖြစ်တတ်ကြတယ်မဟုတ်လား၊ ခွက်အကွဲလေးကို ပြန်ဆက်ဖို့ တော့ ကျနော်စိတ်မကူးပါဘူး၊ သူ ကျနော့်ကို ကော်ဖီတွေအများကြီး ဆောင်ကြဉ်းလာခဲ့ပြီးပြီပဲ၊ အခု အနားယူပါစေတော့၊ တွေ့ကရာခွက် တစ်ခုနဲ့ ကော်ဖီထည့်သောက်လိုက်တိုင်း တရံတခါဆီက သဲကျောက်ခွက်ကလေးကို ကျနော်သတိရဆဲပါပဲ။ ။


IMG_4732a
Canon 450d, EF 100mm f/2.8 macro USM, 100mm, f/2.8, 1/60, iso100, bounce-flash


ညီလင်းသစ်
၂၁ စက်တင်ဘာ၊ ၂၀၀၉

19 September 2009

သင်္ဘော (၃)


သင်္ဘောများက သူ့ရဲ့နေ့စဉ်ဘဝထဲမှာ ပုံမှန်မပါဝင်တော့ပေမယ့် သူစိမ်းပြင်ပြင်တော့ ဖြစ်မသွားပါ၊ သူနေထိုင်ရာ နေရာမှာ သင်္ဘောတစ်စီးမဟုတ် တစ်စီးတော့ အမြဲလိုလို တွေ့နေရစမြဲ...၊ ထိုသင်္ဘောတွေက ဆွစ်ဇာလန်နိုင်ငံ နှင့် တဖက်ကမ်းပြင်သစ်နိုင်ငံကို ပြေးဆွဲသည့် ကူးတို့သင်္ဘောတွေ ဖြစ်သည်၊ မနက်ဆိုလျှင် ဆွစ်ဇာလန်မှာ လာပြီးအလုပ်လုပ်မည့် ပြင်သစ်တွေက ထိုသင်္ဘောတွေကိုစီးကာ ရောက်လာကြသည်၊ ညနေတိုင်လျှင်တော့ ထိုသင်္ဘောတွေဖြင့်ပင် တဖက်ကမ်း ပြင်သစ်နိုင်ငံရှိအိမ်သို့ အလျှိုလျှို ပြန်ကြစမြဲ...၊ သူတို့ကို ကြည့်ကာ သူ ငယ်စဉ်ဘဝ ရန်ကုန် သန်လျင်ကို အသွားအပြန် အလုပ်,လုပ်ရသည့် မြင်ကွင်းတွေကိုပင် သတိရလာခဲ့သည်၊

ဆွစ်နှင့် ပြင်သစ်ပြေးဆွဲသည့် ဤသင်္ဘောတွေကတော့ မြစ်ထဲမှာ မောင်းကြသည်မဟုတ်၊ အင်းလေးကန်ထက် သုံးဆခန့်ကျယ်မည့် ရေကန်ကြီးထဲမှာ ခုတ်မောင်းကြခြင်း ဖြစ်သည်၊ တဖက်ကမ်းကိုဖြတ်ကူးရန် မိနစ် ၅၀ ခန့် ကြာမြင့်ပါသည်၊ နွေရာသီ ပွင့်လင်းရာသီသို့ ရောက်သောအခါ ထိုပုံမှန်ကူးတို့ သင်္ဘောတွေအပြင် တိုးရစ်တွေ အတွက်ပါ အပျော်စီး သင်္ဘောခရီးစဉ်တွေ ရှိပါသည်၊ ထိုအပျော်စီး သင်္ဘောတွေဖြင့် တမြို့မှတမြို့သို့ သွားရင်း မြို့တွေ၏ အဝေးမြင်ကွင်းများ၊ စပျစ်စိုက်ခင်းများ၊ အဲ့လ်ပ်စ်နှင့် ဂျူရာတောင်တန်းများကို ငေးမောခံစား နိုင်ပါ သည်၊

သူ သဘောအကျဆုံးကတော့ သင်္ဘောများကို ထိန်းသိမ်းထားသည့် စနစ်ဖြစ်သည်၊ ၂၀ ရာစုနှစ်ဦးမှာ ထုတ်လုပ် ခဲ့သောထိုသင်္ဘောများသည် ယခုအချိန်အထိ လတ်ဆတ်သစ်လွင်စွာပင် ရှိနေကြသေးသည်၊ အချို့ဘေး ရေယက်ပါသည့်သင်္ဘောတွေဆိုလျှင် ထိုရေယက်များကိုပင်သုံးကာ မောင်းနှင်နေကြဆဲဖြစ်သည်၊ သူ နေထိုင်ရာ နေရာမှ အနီးအနားတွင် ဆိပ်ကမ်းငယ်ကလေးတစ်ခု ရှိသည်၊ ထို ဆိပ်ကမ်းလေးကို ဆိုက်ရောက်လာသော သင်္ဘောတစ်စီးတလေကိုတော့ သူ ရံဖန်ရံခါ စီးနေဖြစ်ဦးမည် ဖြစ်ပါသည်။


ကူးတို့ (၁)
IMG_4194a


ကူးတို့ (၂)
IMG_4197a


ကူးတို့ (၃)
IMG_4619a


ညီလင်းသစ်
၁၉ စက်တင်ဘာ၊ ၂၀၀၉

02 September 2009

သင်္ဘော (၂)


သူ မြန်မာပြည်ပြင်ပ ရောက်လာပြီးတဲ့နောက်တော့ သင်္ဘောတွေနှင့် သိပ်ပြီး ထိတွေ့မှု မရှိလှတော့၊ အခြားသူ တွေလိုပဲ အခြေချနေထိုင်ကာစ ကြုံရတဲ့ အခက်အခဲ၊ အထာမကျသေးမှုတွေကြားမှာ သင်္ဘောတွေက သူနဲ့တော် တော်ဝေးဝေးကို ရောက်သွားကြသည်၊ ပြီးတော့ သူနေတာက ဗင်းနစ်လို၊ ဟောင်ကောင်လို နေရာမှာမဟုတ် တော့ နေ့စဉ်ဘဝတွေထဲမှာ သင်္ဘောတွေက ပါမလာနိုင်ကြတော့...၊

အလုပ်ကိစ္စလည်းမဟုတ်၊ မစီးမဖြစ်စီးရမည့်အခါလည်း မဟုတ်တော့သည့်အခါ သင်္ဘောတစ်စီးနှင့် ဆုံနိုင်ရန်မှာ ထိုသင်္ဘောကို တမင်တကာ ရွေးချယ်စီးနင်းလိုက်ဖို့သာ ကျန်ပါတော့သည်၊ ထိုသို့ဖြင့် သူ သင်္ဘော ၂ စီးဖြင့်ကြုံခဲ့ ရပြန်လေသည်၊ သင်္ဘောဟုသာ ခေါ်ရသော်လည်း တကယ်တမ်းမှာ အပျော်စီးရွက်လှေ၊ အကြီးစားမော်တော် အဆင့်သာသာပဲ ရှိကြပါသည်၊

ပထမတစ်စီးမှာ သူ ဂရိကျွန်းစုတစ်ခုကို ရောက်တုန်းကဖြစ်သည်၊ ဂရိကုန်းမကြီး၏ အရှေ့တောင်ဖက် ၇၅ ကီလို မီတာအကွာမှာ ရှိသော Santorini ဟုအမည်ရသည့် ထိုကျွန်းသည် မီးတောင်ဟောင်းတစ်ခုဖြစ်သည်၊ ဘီစီ ၁၆၀၀ ဝန်းကျင်ခန့်မှာ မီးတောင်ပေါက်ကွဲရာမှ ကွဲထွက်ကျန်ရစ်ခဲ့သော ကျွန်းဖြစ်သည်၊ ထိုကျွန်းကိုရောက်တုန်း တစ်ရက်မှာ သင်္ဘောစီးဖို့ စီစဉ်ဖြစ်ကြသည်၊ သင်္ဘောက ကျွန်းမကြီးကနေ စ,ထွက်ပြီး ကျွန်းစုလေးအချို့ကိုရပ်၊ မီးခိုးငွေ့တွေ အူနေဆဲဖြစ်သည့် မီးတောင်တွင်းဝတစ်ခုမှာရပ်၊ နောက်ထပ်ကျွန်းစုတစ်ခုမှာရပ်၊ ပြီးတော့မူလဆိပ် ကမ်းကိုပြန်လာ၊ တနေကုန်ခရီးဖြစ်သည်၊

ဂျပန်၏စစ်လျော်ကြေးသင်္ဘော၊ တရုတ်၏ခေတ်မီသင်္ဘော စသည်တို့နှင့် ရင်းနှီးခဲ့သောသူသည် ဂရိရိုးရာမပျက် ဆောက်ထားသည့် သစ်သားရွက်လှေကြီးကို တွေ့လိုက်တော့ အတော်ပင် အံ့သြစိတ်ဝင်စားသွားခဲ့သည်၊ အစိတ် အပိုင်းအားလုံး နီးပါးကို သစ်သားဖြင့်သာ ဆောက်လုပ်ထားသော ထိုရွက်လှေကြီးသည် စက်တပ်အင်ဂျင် အကောင်းစားဖြင့် ပေါ့ပါးစွာ ခုတ်မောင်းလျက်ရှိသည်၊ ခရီးသည်တွေက ကုန်းပတ်ပေါ်က ခုံတန်းတွေပေါ်မှာ ထိုင်ရပြီး လှေဝမ်းထဲမှာတော့ အိမ်သာနှင့် သင်္ဘောသားတို့၏ အခန်းအချို့ ရှိပါသည်၊ လှေကြီးကို တိုးရစ်စ်တွေ အတွက်ရည်ရွယ်ပြီး ဆောက်ထားခဲ့သလို သူအပါအဝင် ခရီးသည်အားလုံးမှာလည်း တိုးရစ်စ်များသာ ဖြစ်ကြ လေသည်၊


DSC00116a


ထိုရွက်လှေနှင့် ပတ်သက်ပြီး သူအမှတ်ရနေသည့် အဖြစ်အပျက်တခုရှိသည်၊ ဒုတိယ ရပ်နားသည့်နေရာဖြစ် သည့် မီးတောင်ကို ရောက်တော့ အားလုံးဆင်းကြသည်၊ အဲဒီနေရာမှာ လည်ပတ်ဖို့ တစ်နာရီ အချိန်ရပါသည်၊ မီးတောင်ဝ အချို့နေရာများတွင် မီးခိုးများ အနည်းငယ်ထွက်လျက် ရှိပြီး၊ အချို့နေရာများတွင်တော့ အဝါရောင် ကန့်များ အတုံးအခဲလိုက် တွေ့ရသည်၊ ကျန်တာကတော့ မီးတောင်ဆိုသည့်အတိုင်း မြက်တစ်ပင်မျှပင် မတွေ့ရ၊ ထိုမီးတောင် ပေါက်ကွဲပြီးခဲ့တာ ရာစုနှစ်ပေါင်းများစွာ ကြာခဲ့ပေမယ့် ယနေ့ထိတိုင် နေ့စဉ်လိုလို မီးခိုးတွေအူဆဲ ပင်ရှိသေးသည်၊ တကယ်တော့ မီးတောင်တစ်လုံးသည် မည်သည့်အခါမှ မသေပါ၊ လူတွေက ဘယ်လောက်ပင် မီးငြိမ်းတောင်ဟု ခေါ်ပါစေ... လုံလောက်သော အကြောင်းတရားများ ရှိခဲ့လျှင် အချိန်မရွေး ပြန်လည်ပေါက်ကွဲ နိုင်ပါသည်၊ ` အခုနေများ မီးတောင်က ဒေါသတွေထ,ထွက်လာရင် ဘယ်လိုများနေမလဲ မသိဘူး ’ဟု သူ ခပ်နောက်နောက် တွေးနေမိသေးသည်၊ သူနှင့် မအိမ်သူက တစ်ပတ်လျှောက်ကြည့်ပြီး လှေပေါ်ကို ပြန်လာထိုင် နေလိုက်သည်၊ ထိုစဉ်မှာပဲ အခြားစုံတွဲ တစ်တွဲလည်း ကမ်းဖက်ဆင်းလာသည်၊ ပြီးတော့ တစ်စီးကျော်မှ အခြားရွက်လှေပေါ်သို့ တက်သွားကြသည်၊

ထိုစုံတွဲကို သူကောင်းကောင်း မှတ်မိပါသည်၊ အလာခရီးတုန်းက သူတို့နှင့် ခပ်လှမ်းလှမ်းမှာ ထိုင်လိုက်လာခဲ့ သောလူငယ်စုံတွဲဖြစ်သည်၊ အခုသူတို့က အခြားလှေပေါ်ကို မှားပြီးတက်သွားပြီ၊ လှေတွေအားလုံးနီးပါးကလည်း ဂရိရိုးရာမပျက် ဆောက်ထားကြတော့ တစ်စီးနှင့်တစ်စီး ခပ်ဆင်ဆင်...၊ သူတို့များ ဒီဖက်လှည့်ကြည့်ရင် လက်လှမ်းပြပြီး လှေမှားနေတာ ပြောဖို့သူစောင့်နေခဲ့သည်၊ သို့သော် သူတို့က လှည့်မကြည့်၊ အေးအေးဆေး ဆေးနှင့် မုန့်တစ်ထုပ်ပင် ဖောက်စားနေကြတာကို ကြားထဲမှ လှေကိုကျော်၍ သူမြင်နေရသည်၊ သူဘာလုပ်ရင် ကောင်းမလဲ စဉ်းစားသည်၊ သွားပြောလိုက်ရမလား၊ အာ... အဲဒီလိုတော့ သွားမပြောချင်၊ သူတို့နှင့်လည်း တခါမှ မရင်းနှီး၊ ပြီးတော့ကိုယ်က သူတို့ရဲ့ တိုးရစ်စ်ဂိုက်လည်းမဟုတ်၊ ဒီဆိပ်ကမ်းက ဝန်ထမ်းလည်း မဟုတ်၊ ဘာမှ မဆီမဆိုင် လာပြောတာကို တချို့က ကြိုက်ချင်မှကြိုက်လိမ့်မည်၊

တဖက်ကလည်း သူသံသယ ဝင်လာပြန်သည်၊ နေစမ်းပါဦး၊ သူတို့က ဒီလှေပေါ်မှာ လိုက်လာခဲ့တာ တကယ်ပဲ သေချာလို့လား၊ သူတို့ လှေဆိပ်ဆင်းလာပုံက လှေတွေအများကြီး ရှိတာကို တခြားဘယ်လှေမှ မကြည့်ပဲ အဲဒီ လှေပေါ်ကိုပဲ တန်းတန်းမတ်မတ် တက်သွားတာဆိုတော့ သူတို့ကိုယ် သူတို့သိပ်သေချာ နေပုံပဲ၊ တော်ကြာကိုယ် ကစေတနာနဲ့ သွားပြောပေမယ့် သူတို့ကမမှားဘူးဆိုရင် ကိုယ်ပဲ အူကြောင်ကြောင်နဲ့ အရှက်ကွဲပြီး ပြန်လာရမှာ၊ လူတစ်ယောက်ကို သေသေချာချာ တစ်ခါမြင်ဖူးထားလျှင် အချိန်တွေအများကြီး ကြာသည့်တိုင် ကောင်းကောင်း ပြန်မှတ်မိတတ်သည့် သူ့မှတ်ဥာဏ်က သူမမှားကြောင်း ပြောနေခဲ့သည်၊ ဒါပေမယ့် ` အေးလေ... ငါပဲအမှတ်မှား တာနေမှာပါပဲ ’ဟု သူဖေါ့တွေးလိုက်သည်၊ ပြီးတော့ အခုလို ခရီးထွက်ပြီ ဆိုကတည်းက ကိုယ့်တာဝန် ကိုယ်ယူ ကြရမှာပဲလေ၊ မဟုတ်ဘူးလား၊

ထိုအခိုက်မှာ သူတို့လှေပေါ်မှာလည်း လူတွေအားလုံးစုံပြီ၊ တိုးရစ်စ်ဂိုက် အမျိုးသမီးက ` ကဲ-အားလုံးပဲ သွားကြ မယ် ’ဟုဆိုကာ ရွက်လှေကြီးလည်း ထွက်ခွာဖို့ပြင်သည်၊ ထို ဂရိအမျိုးသမီးကို သွားပြောလိုက်ရရင် ကောင်းမ လားဟု သူစဉ်းစားလိုက်သေးသည်၊ သူကသာ မဆီမဆိုင် ခရီးသည်တွေကို မှတ်မိပူပန် နေသော်လည်း ဂိုက် အမျိုးသမီးက လှေပေါ်မှာ လူပင်တချက်မစစ်ပါ၊ သူ့မှာတော့ မြန်မာပြည်မှာ ဧည့်လမ်းညွှန် လုပ်ခဲ့တုန်းက ကား၊ ရထား၊ သင်္ဘော မထွက်မီ လူပြည့်,မပြည့် ရေကြည့်ရတာအမော၊ တစ်ခါလည်း မကျေနပ်၊ နှစ်ခါလည်း မကျေ နပ်၊ အခေါက်ခေါက် အခါခါ၊ အင်းလေ..သူ့အရပ်နဲ့ သူ့ဇတ်ပေပဲ ဟုသာ သူတွေးလိုက်သည်၊ ဒီအမျိုးသမီးက ကမ်းနားအဆင်း တနေရာမှာထိုင်ပြီး ဆင်းလာတဲ့သူတွေကို ရေရင်လည်း ရေနေခဲ့မှာပေါ့ဟု သူစဉ်းစားနေ ပြန် သည်၊ ရွက်လှေကတော့ ကမ်းမှ အတော်ပင် ခွာလာခဲ့ပြီ၊

ထိုစဉ်မှာ ရွက်လှေမောင်းသူက ဝေါ်ကီတော်ကီဖြင့် တစုံတခုကို ဂရိလိုပြောပြီး အနောက်ဖက်သို့ လှည့်ကြည့်နေ သည်ကို သူမြင်လိုက်သည့် အခါမှာတော့ သူတွေးထင်ထားတာတွေ အားလုံးမှန်ကြောင်း သူသိလိုက်လေသည်၊ ရွက်လှေဆရာက တဆက်တည်း ဂိုက်အမျိုးသမီးကို ပြောလည်းပြော၊ လှေကိုလည်း တစ်ရာ့ရှစ်ဆယ် ဒီဂရီ ပြန် ကွေ့လိုက်သည်၊ ကျန်ခရီးသည်များကို ဂရိအမျိုးသမီးက လူနှစ်ယောက်ကျန်ခဲ့လို့ သွားပြန်ခေါ်ရမှာ ဖြစ်ကြောင်း ရှင်းပြနေချိန်မှာတော့ သူ့တကိုယ်လုံးကို ကျုံ့ထားမိသည်၊ ဆပ်ကမ်း ပြန်ရောက်လို့ လှေပေါ်ကို ထိုစုံတွဲ တက် လာသောအခါ အားလုံးက လှေတစ်စီးလုံး လွဲရအောင် နမော်နမဲ့ နိုင်ရသလားဟူသော အကြည့်တွေဖြင့်ကြည့် ကြတော့ ဟိုနှစ်ယောက်လည်း မျက်နှာငယ်လေးတွေနှင့်...၊ သူလည်း ထူပူကာ ပင်လယ်ရေပြင်ကိုပဲ စိုက်ကြည့် နေခဲ့သည်၊ ဒီကိစ္စဟာ မစူးမစမ်း သတိကင်းမဲ့လွန်းတဲ့ ထိုစုံတွဲကိစ္စလား၊ ကိုယ့်လှေပေါ်က ခရီးသည်တွေကိုမစစ် ဘဲ တာဝန်မဲ့ခဲ့တဲ့ ဧည့်လမ်းညွှန် အမျိုးသမီးရဲ့ ကိစ္စလား၊ ဒါမှမဟုတ် ကြားထဲကနေ မှတ်မိပူပန်ပြီး တာဝန်သိ လုပ်သားပြည်သူတစ်ဦး မဟုတ်ခဲ့တဲ့ သူ့ကိစ္စလား၊ ပြန်တွေးတိုင်း သူ့မှာ အပြစ်ရှိသလိုလို၊ မရှိသလိုလို နှင့် ဒီနေ့အထိ သူရေရေရာရာ မသိခဲ့၊ ဂရိသင်္ဘောကတော့ ခရီးသည်တွေကို ပို့မြဲတိုင်း ဆက်ပို့နေလိမ့်ဦးမည်၊


IMG_2110a


နောက်ထပ် စီးဖြစ်ခဲ့သည့် သင်္ဘောကတော့ အီဂျစ်နိုင်ငံမှာ ဖြစ်သည်၊ သင်္ဘောဆိုသော်လည်း မော်တော်အကြီး စားဟုခေါ်လျှင် ပိုမှန်လိမ့်မည်ထင်သည်၊ ပင်လယ်နီကမ်းခြေ မြို့ကလေးကို သူရောက်သည်အထိ ဒီလိုမော် တော်မျိုးတွေ ရှိမှန်း သူမသိခဲ့၊ လမ်းတွေ၊ ဈေးတွေမှာ ကြော်ငြာထားတာ မြင်မှ သူသဘောပေါက်သွားသည်၊ မော်တော်ရဲ့ ဝမ်းဗိုက်ကို မှန်အထူ အကြည်စားဖြင့် ပြုလုပ်ထားသော ထိုမော်တော်များသည် ထိုဒေသတဝိုက်မှာ တော့ အတော်ပင် အလုပ်ဖြစ်ဟန် ရှိလေသည်၊ ပင်လယ်နီ၏ ကမ်းရိုးတန်းတလျှောက်တွင် သန္တာကျောက်တန်း များနှင့် ငါးရောင်စုံတို့ ပေါများလှသောကြောင့် ထိုမော်တော်ပေါ်မှနေ၍ ရေအောက်ကို ကြည်လင်ပြတ်သားစွာ မြင်နိုင်ပါသည်၊ ရေငုပ်ဝါသနာပါသူများလို မငုပ်နိုင်သည့် သူများက ထိုမော်တော်တွေကို စီးကြသည်၊

တကယ်တမ်း သူစီးချင်တာက ဝမ်းဗိုက်အောက်ထဲအထိ ဆင်းသွားရသည့် မော်တော်ဖြစ်သည်၊ မော်တော်၏ဝမ်း ဗိုက်ထဲမှ အခန်းသည် ရေအောက်ထဲတွင်ရှိပြီး ပတ်ပတ်လည် မှန်များဖြင့် တည်ဆောက်ထားသောကြောင့် စီးသူ က ရေငုပ်သင်္ဘောထဲ ရောက်နေသလို ခံစားရသည်၊ ဘေးပတ်လည်မှ ငါးများကို လှည့်ပတ်ကြည့်နိုင်သည်၊ သို့ သော် မအိမ်သူက အကျဉ်းအကျပ်ကို ကြောက်သည့် claustrophobic အခံရှိသည်၊ ထိုရေအောက်ခန်းထဲကို ဆင်းရမှာ သူမ ကြောက်နေခဲ့သည်၊ သူ့ကို တစ်ယောက်ထဲ သွားစီးဖို့ပြောပေမယ့် အဲဒီလိုကျတော့ သူကလည်း မစီးချင်ပြန်၊ ဒီလိုနှင့် မော်တော်ဝမ်းဗိုက် ရေအောက်ထဲလည်း ဆင်းစရာမလိုဘဲ ကိုယ့်ထိုင်ခုံမှပင် ရေအောက် တော်တော်အနက်အထိ ကြည့်နိုင်မည့် ထိုမော်တော်တွေကိုပဲ ရွေးလိုက်ကြတော့သည်၊


IMG_2292a


မော်တော်စီးချိန်က တစ်နာရီခန့်သာ ကြာမြင့်ပါသည်၊ အသွားမှာ ဟိုနားရပ်၊ ဒီနားရပ်ဖြင့် ရေအောက်မှရှုခင်းများ ကို ပြသည်၊ မော်တော်မောင်းသူက ဘယ်နေရာမှာ ငါးရှိသည်၊ ဘယ်နေရာမှာတော့ သန္တာကျောက်တန်းရှိသည် စသဖြင့် အလွတ်ရနေသောကြောင့် လမ်းကြောင်းကို ဆွဲထားခဲ့ပြီးသား...၊ အပြန်မှာတော့ ခရီးသည်တွေကို မော်တော်အပေါ်ထပ်မှာ ရေနွေးကြမ်းတိုက်ပြီး အမှတ်တရပစ္စည်းလေးတွေ ရောင်းဖို့လုပ်ကြသည်၊ သူမြင်ရသ လောက်ကတော့ ဘယ်သူမှမဝယ်ချေ၊ မော်တော်ပေါ်မှာလည်း ခရီးသည်က အနည်းငယ်ပဲ ပါလာခဲ့သည်ကိုး၊ ဒီလိုရေအောက်က ငါးတွေကိုကြည့်ရင်း ဧရာဝတီမြစ်ထဲမှ လင်းပိုင်တွေကို သူသတိရမိသေးသည်၊ ဗန်းမော်မှ မင်းကွန်းအထက်နားအထိ ဆင်းလာတတ်ကြသည့် ရေချိုလင်းပိုင်များ ဖြစ်ကြသည်၊ တခါမှာတော့ မင်းကွန်း အသွားမှာ သူ,ရိပ်ကနဲ တစ်ကောင်တွေ့လိုက်ဖူးသည်၊ နောက်တော့ တခါမှ ပြန်မတွေ့ရတော့၊ ထိုလင်းပိုင်များကို လည်း ဒီလိုမော်တော်တွေဖြင့် လိုက်ပြသည့် ခရီးစဉ်တွေရှိရင် ကောင်းမှာပဲဟု သူတွေးမိလေသည်၊ ဒါပေမယ့် ဧရာဝတီရဲ့ ခပ်နောက်နောက်ရေထဲမှာ သိပ်အနက်ကြီးအထိတော့ မြင်ရမည်မထင်၊ ဒါလည်းကိစ္စမရှိပါ၊ ဧရာဝတီ ၏ ခမ်းနားကြီးကျယ်မှု တခုတည်းကပင် ခရီးသည်တွေကို မေ့မရအောင် ဖမ်းစားညှို့ယူထားလိမ့်မည်ဟု သူ အသေအချာ ယုံကြည်ပါသည်။ ။



ညီလင်းသစ်
၂ စက်တင်ဘာ၊ ၂၀၀၉