ညီလင်းသစ်: November 2009

ဒီနေရာကို ကျနော်ရောက်ခဲ့ရပြန်ပါပြီ၊ နှစ်အတော်ကြာကြာ ဝေးနေခဲ့ပေမယ့် အရာအားလုံးဟာ မနေ့တနေ့ကလိုပါပဲ၊ ဒီခရီးစဉ်ကို စီစဉ် လိုက်ကတည်းက ဒီနေရာကိုတော့ မရောက်မဖြစ် ရောက်ရမယ်လို့ ပိုင်းဖြတ်ထားခဲ့ပြီးသား...၊

ရောက်ပြီး နည်းနည်းအသားကျလို့ သေသေချာချာ ကြည့်မှ “ လောလောပူသောအရပ် ” လို့ သိပ်ခေါ်လို့ ရတော့မယ် မထင်ဘူး၊ ပုဂံဟာ သစ်ပင်ကြီးငယ်တွေနဲ့ အတော့်ကို စိမ်းစိမ်းစိုစို ဖြစ်နေပြီ၊ ဆယ်စုနှစ်တစ်ခု အတွင်းမှာကို အရိပ်ရပင်တွေ အတော်များလာခဲ့တယ်၊ အကျိုး ဆက်တခုကတော့ ဘုရားနဲ့ ဂူကျောင်းခပ်ငယ်ငယ်တွေကို Panoramic မြင်ကွင်းထဲမှာ မမြင်ရတော့တာပါပဲ၊ တချို့ကျတော့လည်း သစ်ပင်စိမ်းတွေ ကြားက အုတ်နီခဲရောင် ဘုရားတွေက ပိုပြီးကြည့်လို့ကောင်းတယ်၊ ပို သပ္ပါယ်တယ်လို့ ဆိုကြတယ်၊

ကျနော် ၄ ရက်နေခဲ့ပေမယ့် မဝသေးဘူး၊ တကယ်တော့လည်း ဘယ်နှစ်ရက်လောက်နေမှ နည်းနည်း ' အီ ' သွားမလဲ မသိဘူး၊ လေ့လာရေး ထွက်ခဲ့တုန်းက တလလောက်နေခဲ့သေးတယ်၊ ဒါလည်း တိုတောင်းလွန်းတယ်လို့ ထင်တာပါပဲ၊

ကျနော် အကြိမ်ပေါင်းများ စွာရောက်ခဲ့ဖူးတဲ့နေရာ၊ ဘယ်နှစ်ကြိမ်ရောက်ရောက် ဘယ်တော့မှ မရိုးတဲ့နေရာ၊ အုတ်နီခဲရောင်တွေ မြင်လိုက်ရရင်ကိုပဲ ရင်ခုန်လာတတ် တဲ့နေရာ...၊ ချစ်သော ပုဂံက ပုံတစ်ချို့ကို တင်လိုက်ပါတယ်၊ ကျနော် ခရီးသွားနေစဉ်ကာလမှာ အေးခဲ၊ ငြိမ်သက်နေခဲ့တဲ့ ဘလော့ဂ်လေးကို လာကြည့်ပြီး ပြန်,ပြန်သွားရတဲ့ မိတ်ဆွေတို့အတွက် အမှတ်တရပါ။ ။

ပုဂံ (၁)