လူဆိုးနှင့်သူခိုး အရှုပ်တော်ပုံ

မနေ့တုန်းက ကျောင်းကအပြန်မှာ သားကတလမ်းလုံး ဂျီတိုက်လာခဲ့သည်၊ ပြဿနာက သူတို့ကျောင်းဝင်းထဲက ရေကူးကန် ကလေးက စ,သည်၊ ပူအိုက်တဲ့ နွေရာသီ ရောက်လာပြီဆိုတော့ နေ့လယ်ပိုင်း ကလေးတွေ ရေကစားစေဖို့ ကျောင်းဝင်း ထဲက သစ်ပင်ရိပ်မှာ လေမှုတ်သွင်းရသည့် ပလပ်စတစ် ရေကန်လေး ၂ ခု ချထားပေးသည်၊ ဒါပေမယ့် နေက ကောင်းကောင်း မပူသေးတာကြောင့် ကလေးတွေက ကန်ထဲကို ဆင်းခွင့် မရသေး၊ တနေ့က တပြိုက်နှစ်ပြိုက် ရွာလိုက်သည့် မိုးရေအချို့သာ ကန်ထဲမှာ ရှိသည်၊ နေ့ခင်းပိုင်းတွေမှာ ဆရာမတွေက တားမြစ်ထား၍ ကန်ထဲကို မဆင်းရသည့်အတွက် သားက ညနေပိုင်း သူ့အမေလာကြိုသည့် အချိန်မှာ အမေအားကိုးဖြင့် ဆင်းဖို့ ကြိုးစားခဲ့ခြင်း ဖြစ်သည်၊ အမေကလည်း သဘောမတူ၊ မိဘရောက်လာသော်လည်း ကျောင်းဝင်းထဲမှာ ကျောင်းစည်းကမ်းသည်သာ အတည်ဖြစ်သည်၊ သူ့ကို အကျိုးသင့်အကြောင်းသင့် ရှင်းပြနေသည့်ကြားကပင် ဖိနပ်မချွတ်၊ ဘောင်းဘီမချွတ်ဘဲ လှစ်ကနဲ ပြေးဆင်းလိုက်သည်၊ ပြီးတော့ သဘောတကျဖြင့် ရယ်မောပြီးတောင် နေလိုက်သေးသည်၊ သည်တော့ သူ့အမေက ဆူတော့သည်၊ အဆူခံရတော့ စူပုပ်ပုပ်ဖြင့် ဂျီကျချင်သည်၊ ဒါက ကျောင်းလေးရှေ့ကို ကျနော်ရောက်သွားသည့် အချိန်မှာ ဖြစ်နေသည့် သူတို့သားအမိ၏ အခြေအနေ...၊

ကျနော်က ထိုအခြေအနေကို ဝင်ထိန်းဖို့ ကြိုးစားသော်လည်း သိပ်မအောင်မြင်၊ ကျနော့်စက်ဘီးနောက်မှာ သူထိုင်လိုက် နေကျ ဆွဲအိမ်လေးထဲ ဝင်ထိုင်ဖို့ ပြောလည်း မဝင်၊ သူ့စက်ဘီးစီး ခမောက်လေးကို ဆောင်းဖို့ ပြောလည်း မရ၊ မဆောင်းသည့် အပြင် ခမောက်ကိုတောင် သူက လွှင့်ပစ်လိုက် သေးသည်၊ ဒါကတော့ ကျနော်တို့ သတ်မှတ်ထားသော ဘောင်ကျော်သွားခဲ့ပြီ ဖြစ်သည်၊ ကျနော်က 'ဒီလို အပြုအမူတွေကို ကျနော်တို့ မကြိုက်တာ သူအသိပင်ဖြစ်ကြောင်း၊ အခုလို ရိုင်းစိုင်းတဲ့ အမူအကျင့် အတွက် အဖိုးအခ ပေးရမှာ ဖြစ်ကြောင်း၊ အဲဒါကတော့ ဒီနေ့ည သူ့ကို ပေးကြည့်မယ်လို့ ပြောထားတဲ့ 'My neighbour Totoro' ကို ကြည့်ခွင့်မပေးတော့ကြောင်း' ပြောလိုက်သည်၊ ပုံမှန်ဆိုလျှင် ဒီလို ဒဏ်ပေးခံရ မည့်အကြောင်း ကြားလျှင် သားက ငိုမဲ့မဲ့ ဖြစ်သွားတတ်သော်လည်း ဒီတခေါက်မှာတော့ ကျနော့်ကိုသာ စူပုပ်ပုပ်နှင့် ပြန်ကြည့်နေခဲ့သည်၊ ပြီးတော့ မဝင်ချင့် ဝင်ချင်နှင့် စက်ဘီးနောက်မှာ ဆွဲသည့် သူ့လှည်းကလေးထဲ ဝင်ထိုင်သည်၊

ဒါပေမယ့် သူ့ဒေါသက အိမ်ရောက်သည်အထိ ပြေပုံမရပါ၊ ကျနော်က စက်ဘီးတွေကို စက်ဘီးထားသည့် အခန်းက တန်းမှာချိတ်နေတုန်း အိမ်တံခါးဝမှာ သူ့အမေကို ကလန်ကဆန် လုပ်သည့်အနေဖြင့် သူ့ဖိနပ်တွေကို ချွတ်ပြီး လွှင့်ပစ်ပြန်သည်၊ ကလေးတစ်ယောက် အသက် ၄ နှစ်အရွယ်ကို ရောက်သည့်အခါ မိဘနှင့် အားပြိုင်မှု စ,လေ့ရှိသည်ဟု ဆိုသည်၊ မိဘ၏ အခွင့်အာဏာနှင့် သူ၏ လုပ်ပိုင်ခွင့်တို့အကြား နယ်နမိတ်ကို ရှာဖွေလေ့ ရှိသည်၊ ထိပ်တိုက် ရင်ဆိုင်မှုလေးများ ဖြစ်လာသည့်အခါ စိတ်ဆိုးပေါက်ကွဲခြင်းဖြင့် ၄င်းတို့၏ လူသားဆန်မှုကို ပြလေ့ရှိပါသည်၊ ယခု သားက စိတ်ပညာရှင်များ သတ်မှတ်ထားသည့် အချက်များအတိုင်း တသေဝေမတိမ်း လူသားဆန်နေခြင်းပဲ ဖြစ်သည်၊ သို့သော် ကျနော်တို့က သူ့ကို ယဉ်ကျေးသော လမ်းပေါ်မှ လူသားကလေးပဲ ဖြစ်စေချင်သည် မဟုတ်လား၊ သို့နှင့် ကျနော်က 'သူ၏ ရင့်သီးသော ဒုတိယ အပြုအမူအတွက် ဒုတိယ အဖိုးအခကို ထပ်ပြီး ပေးရလိမ့်မည် ဖြစ်ကြောင်း' ပြောလိုက်သည်၊ အိမ်ထဲရောက်တော့ လက်ဆေးပြီးတာနှင့် နံရံကို မျက်နှာမူပြီး ခုံတစ်လုံးပေါ်မှာ ထိုင်ခိုင်းသည်၊ အနားမှာ မီးဖိုချောင်သုံး timer ကို ၃ မိနစ်ချိန်ပြီး ချထားလိုက်သည်၊ ခုံပေါ်မှာ နံရံကို မျက်နှာမူထိုင်...၊ လုပ်ခဲ့တာတွေ မှန်လားမှားလား ပြန်စဉ်းစား၊ ၃ မိနစ် မပြည့်မချင်း မထရ...၊ ဒီလို ထိုင်ခုံမှာ ထိုင်စေသည့် ဒဏ်ပေးနည်းအတွက် ထိုင်ရမည့်ကြာချိန်ကို အသက် ၁ နှစ်၊ ၁ မိနစ်ဟု ကလေး စိတ်ပညာစာအုပ်တွေက ဆိုသည်၊ သားက ၄ နှစ် ပြည့်တော့မှာ ဖြစ်ပေမယ့် ကျနော်က ချစ်ခြင်းအားဖြင့် ၃ မိနစ်သာ ထိုင်စေခဲ့သည်၊

သတ်မှတ်ချိန် timer သံပတ်မြည်တော့ သူ ကျနော့်ကို လှမ်းကြည့်သည်၊ ကျနော် သူ့ဆီကို အသာလျှောက်သွားပြီး သူ့အရှေ့မှာ ထိုင်လိုက် သည်၊ ပြီးတော့ ...

'နာရီ ၃ မိနစ်မြည်သံ သားကြားလိုက်လား' ဟု မေးလိုက်သည်၊ သူ ခေါင်းညိတ်ပြသည်၊ ကျနော့်ကို ကြည့်သည့် မျက်ဝန်းထဲမှာ စိတ်ဆိုးပြေသွားတာ မြင်လိုက်ရသည်၊

'သားကို ဘာဖြစ်လို့ အခုလို ဒဏ်ပေးရလဲ၊ မှတ်မိလား'

'..... ..... .....'

'ညနေတုန်းက ကျောင်းမှာ ပြောနေတဲ့ကြားက ရေကန်လေးထဲကို ခုန်ဆင်းတာ ကောင်းလား'

သူ ခေါင်းခါသည်၊

'စက်ဘီးခမောက်ကို လွှင့်ပစ်တာ၊ အိမ်ရောက်တော့ ဖိနပ်တွေ လွှင့်ပစ်တာ ကောင်းလား'

ခေါင်းခါပြန်သည်၊ မျက်နှာပေးကတော့ တကယ့်ကိုပဲ နောင်တကြီးစွာ ရသွားသည့် ပုံစံ...၊

'သားကို ဆုံးမတယ် ဆိုတာက ချစ်လို့ကွ၊ သား မကျေနပ်တာရှိရင် ပြန်မေးလို့ရတယ်၊ အပြန်အလှန် ဆွေးနွေးလို့ ရတယ်၊ ဒါပေမယ့် မိဘကို အဲဒီလို ရိုင်းစိုင်းတဲ့ အမူအကျင့်တွေနဲ့ ကလန်ကဆန် ပြန်မလုပ်ရဘူး၊ ကြားလား...၊ သားရဲ့ အကျိုးအတွက်ပဲ ပြောနေတာ၊ မိဘ စကား နားမထောင်ဘဲ ထင်ရာစိုင်းပြီး သား ကြီးလာတဲ့အခါ လူဆိုးကြီး ဖြစ်သွားရင် ဘယ်လိုလုပ်မလဲ'

'.... .... ....'

'သား..လူဆိုး ဖြစ်ချင်လား'

'နိုး...သား လူဆိုး မဖြစ်ချင်ဘူး' ဟု စိုးရိမ်တကြီးဖြင့် သူ ပြာပြာသလဲ ပြန်ဖြေသည်၊ ကျနော်က

'အိုကေ..ဘာမှ မစိုးရိမ်နဲ့၊ သား လိမ်လိမ်မာမာနေရင် ဘာမှ မဖြစ်ဘူး၊ သွား...၊ သွား ကစားတော့' ဟု သူ့ ခေါင်းလေးကို နမ်းပြီး ပြောလိုက်တော့ သားက ပျော်ရွှင်စွာနဲ့ ပြေးထွက်သွားသည်၊

သူ့ အခန်းထဲဝင်၊ ဒူးဒူးကို ဆွဲယူပြီး ရင်ခွင်ထဲပိုက်ကာ ကုတင်ရှေ့မှာ ခဏထိုင်နေသည်၊ ခဏကြာတော့ ကွန်ပြူတာရှေ့မှာ ရှိနေသည့် သူ့အမေဆီကို လျှောက်သွားသည်၊ မအိမ်သူက သူ့ကို ဆီးပွေ့လိုက်ပြီး ပေါင်ပေါ်မှာ ချီလိုက်သည်၊ သားက ...

'မာမွန်...'

(မေမေကို ပြင်သစ်လို မာမွန် (maman)ဟု ခေါ်ပါသည်)

'ဘာလဲသား...'

'ပါပါးက သားကို သူခိုးလို့ ပြောတယ်'

အဲဒီစကားကို တဖက်ခန်းမှာ ထိုင်နေသည့် ကျနော်ကြားတော့ မျက်လုံးပြူးသွားသည်၊ ရယ်လည်း ရယ်ချင်သွားသည်၊ အဲဒါမှ ပြဿနာ...၊ ချက်ချင်းဆိုသလိုပဲ သဘောပေါက်လိုက်သည်၊ သားမှာက ကစားစရာ အရုပ်သေးသေးလေးတွေ ရှိသည်၊ တိရိစ္ဆာန် မိသားစု၊ လူစွမ်းကောင်း မိသားစု၊ စက်ရုပ်မိသားစု၊ လူဆိုးမိသားစု၊ အစရှိသဖြင့်...၊ အဲဒီထဲကမှ လူဆိုး မိသားစုမှာ ပါးစပ်ကို အဝတ်စည်းထားသည့် ကောင်တွေနှင့် မျက်လုံးမှာ မျက်ကွင်းအဝတ် စွပ်ထားသည့် ကောင်တွေ ပါသည်၊ တခါမှာတော့ သားက အဲဒီပုံစံ ၂ မျိုးရဲ့ ခြားနားချက်ကို မေးသည်၊ ကျနော်က အလွယ်ဖြင့် မုတ်ဆိတ်မွေး၊ နှုတ်ခမ်းမွေးတွေ ပါတာ.. ဒါမှမဟုတ် ပါးစပ်မှာ အဝတ်စည်းထားတာက လူဆိုး၊ မျက်လုံးမှာ မျက်ကွင်း အဝတ် ဖုံးထားတာက သူခိုးဟု ပြောထားဖူးသည်၊ သားက လူဆိုးနဲ့သူခိုးဟု ရွတ်ကြည့်သည်၊ ကြာတော့ ကြာနေပြီ၊ အခု သားက လူဆိုးနှင့်သူခိုးကို ရောထွေးပြီး ကျနော်ပြောသည့် လူဆိုးအစား သူခိုးဟု ခပ်တည်တည်ဖြင့် ပြောချလိုက်ခြင်း ဖြစ်သည်၊ သူက ပြင်သစ်စကားထဲမှာ သူခိုးဆိုသည့် မြန်မာစကားကို ညှပ်ပြီး ပြောခြင်းဖြစ်သည်၊

ကျနော်တို့ သားအဖ ဇတ်လမ်းကို နားမလည်လိုက်သည့် မအိမ်သူက ...

'ဟင်..ဟုတ်လို့လား၊ ပါပါးက သားကို အဲဒီလို ပြောလား'

'ဟုတ်တယ်၊ သူခိုးလို့ ပြောတယ်'

'ပါပါးက ဘာဖြစ်လို့ အဲလို ပြောရလဲ၊ သားက ဘယ်သူ့ဆီက ဘာတွေ ယူထားလို့လဲ...'

အဲ.. ဇတ်လမ်းကတော့ ရှုပ်သထက် ရှုပ်သွားပြီ၊ သားဆီက ဘာသံမှ ထွက်မလာ၊ သူလည်း အခုမှ ပိုပြီး နားရှုပ်သွားမှာ သေချာသည်၊ အဖေ့အကြောင်း အမေ့ကို သာသာထိုးထိုးလေး တိုင်ကာမှ အမေက ယခု စစ်လား၊ ဆေးလား လုပ်နေပြီ၊ ပြီးတော့ သူ့စကား အမှားကို သူ့ဟာသူလည်း သိပုံမရ...၊ မအိမ်သူက ...

'ပြောလေ သား၊ ဘာဖြစ်လို့ အဲဒီလို သူခိုးလို့ ပြောရသလဲ' ဟု ထပ်မေးပြန်သည်၊

ကျနော် မနေနိုင်တော့ပါ၊ သူတို့ သားအမိဆီ ထ,သွားလိုက်ပြီး ...

'သား သူခိုး ဆိုတာ သေချာရဲ့လား' ဟု ရယ်ကျဲကျဲဖြင့် မေးလိုက်သည်၊

သားက သူ့အမေ ပေါင်ပေါ်ကနေ မျက်လုံး အဝိုင်းသားဖြင့် ကျနော့်ကို ပြန်ကြည့်နေသည်၊ ကျနော်က ဆက်ပြီး

'သူခိုးအပြင် လူဆိုး ဆိုတာလည်း ရှိသေးတယ်လေ' ဟု ထောက်ပေးလိုက်သည်၊

အဲဒီတော့မှ သားလည်း ဝမ်းသာအားရ ဖြစ်သွားသည်၊ လူဆိုး ဆိုသည့် စကားလုံးကို ကြားလိုက်ရသည့် သူ့မျက်နှာက တိမ်ညစ်တအုပ် နောက်မှ ဘွားကနဲ ပေါ်လာသည့် သော်တာလမင်းလို ဝင်းဝင်းပပ...၊

'အား...ဟုတ်တယ်၊ လူဆိုး လူဆိုး....၊ သူခိုး မဟုတ်ဘူး'

သူ့အမေက သူ့ကို ချစ်စနိုးဖြင့် လက်ညှိုးထိုးရင်း ...

'ကောင်လေး တစ်ယောက်တော့ လူဆိုးနဲ့သူခိုး မှားသွားပြီဟေ့...' ဟု အော်ရယ်သည်၊

သားကလည်း ကျနော့်ကို တဆင့်ပြန် လက်ညှိုးထိုးရင်း ရှက်ရယ်, ရယ်သည်၊ ကျနော့်ကြောင့်ပါ ပေါ့လေ၊ ကျနော်ကကော....၊ ကျနော်က လက်ညှိုး ဆက်မထိုးပေမယ့် သူတို့ သားအမိကို ကြည့်ပြီး ရယ်နေခဲ့သည်၊

သားက စိတ်ဆိုးလွယ်သော်လည်း စိတ်ပြေလွယ်သည်၊ သူ့အမေက သူ့ကို 'မီးဖိုပေါ်က နွားနို့' ဟု တခါတရံ ချစ်စနိုး စ,တတ်သည်၊ ပြင်သစ် စကား မီးဖိုပေါ်ကနွားနို့ (Soup au lait) ဆိုသည်မှာ စိတ်ဆိုးလွယ်၊ စိတ်ပြေလွယ်သူတွေကို ခေါ်ခြင်း ဖြစ်ပါသည်၊ နွားနို့က မီးပူတာနှင့် ပြိုက်ကနဲ ဆူပြီး ဝေကျသလို မီးဖိုပေါ်မှ ချလိုက်သည်နှင့် အေးပြီး ချက်ချင်း ပြန်ကျသွားတတ်သည် မဟုတ်လား၊ ပြီးတော့ 'အဲဒါက အဖေနဲ့တူတာ' ဟု ကျနော့်ကို စ,တတ်သေးသည်၊ ထိုအခါမျိုးတွင် ကျနော်က ...

'သြော်.. ကိုယ်တို့ အရှေ့တိုင်းသားတွေက သွေးနွေးတယ်လေ၊ ခံစားလွယ်တယ်ပေါ့' ဟု ခပ်ပြုံးပြုံးဖြင့် ချေပ,ရသည်၊

သေချာသည်က ကျနော်တို့၏ စိတ်ကူးစိတ်သန်းများ၊ အမူအကျင့်များသည် အားလုံးမဟုတ်တောင် ရာခိုင်နှုန်း အတော်များများ သားဆီမှာ စုနေပါလိမ့်မည်၊ ဖြစ်နိုင်လျှင်တော့ စု,နေသော ထိုအရာများကို ကောင်းသော စိတ်ထားအမွေများသာ ဖြစ်စေချင်ပါသည်။ ။

ညီလင်းသစ်
၆ ဇူလိုင်၊ ၂၀၁၁