28 February 2011

စီအမ်ဒီ


အခုတလော အဖွားကို ကျနော် သတိရနေမိသည်၊ အဖိုးအဖွား ၄ ယောက်မှာ အဖေ့ရဲ့အမေ အဖွားတစ်ဦးတည်းကိုသာ ကျနော် ကောင်းကောင်း သိခဲ့ပါသည်၊ မြေးတွေ အများကြီးရှိတဲ့ အထဲမှာမှ အဖွားက ကျနော့်ကို အတော်လေး ချစ်ခဲ့သည်၊ ကျနော့်ကို တော်တော်ကြာကြာ ထိန်းခဲ့ဖူးပြီး သူ့ရဲ့ နောက်ဆုံးအချိန်အထိ ကျနော်ကလည်း အဖွားနဲ့ ရှိနေခဲ့ပါသည်၊

ကျနော်တို့မြေးတွေက ဖွားဖွားလို့ ခေါ်သည့် အဖွားအကြောင်းကို ပြန်စဉ်းစားတိုင်း ရနံ့လေးတခုက သင်းပျံ့လာလေ့ ရှိသည်၊ ခရေပန်း ရနံ့ပင် ဖြစ်ပါသည်၊ ကျနော် မှတ်မိနေသည့် အဖွား၏ ပုံရိပ်များထဲမှာ ခရေပန်းကုံးလေး များက အမြဲလိုလို ပါလေ့ ရှိသည်၊ ဒီခရေကုံးတွေက အဖွားဆီမှာ တစ်နှစ်ပတ်လုံး ရှိနေတာလားတော့ မမှတ်မိ၊ ဒါပေမယ့် အဖွားရဲ့ ဆံထုံးမှာ၊ လက်ကိုင်ပုဝါထုပ်လေးတွေထဲမှာ ဒီခရေကုံး၊ ခရေပန်းတွေက ရှိနေတတ်သည်၊ ပန်းတွေ ခြောက်သွားရင်လည်း အဖွားက တော်တော်နဲ့ မလွှင့်ပစ်၊ အဖွားရဲ့ အဝတ်အစားတွေ အထိပင် ခရေရနံ့က စွဲနေခဲ့သည်ဟု ကျနော်ထင်မိပါသည်၊

နောက်ထပ် မှတ်မိနေသည့် တခုမှာ ဗလရှင် ခံတွင်းမွှေး ပူရှိန်းပြားများ ဖြစ်သည်၊ အဖွားရဲ့ ပုံစံက အသားဖြူဖြူ၊ ခပ်ပြည့်ပြည့်၊ နောက်မြင့်ဆံထုံး ထုံးပြီး ရင်ဖုံးအင်္ကျီ ဝတ်လေ့ရှိသည်၊ ကျနော်တို့ ညီအစ်ကိုတွေ စိတ်ဝင်စားတာက အဲဒီ ရင်ဖုံးအင်္ကျီ ဖြစ်သည်၊ အဲဒီအင်္ကျီတွေရဲ့ အတွင်းဖက်မှာ အိတ်ကပ်ကလေးတစ်ခု အမြဲလိုလို ပါလေ့ရှိသည်၊ အဲဒီ အိတ်ကပ်လေးထဲ အဖွား သိမ်းလေ့ရှိတာက သူ့သံသေတ္တာ ခတ်သည့် သော့လေးတစ်ချောင်းနှင့် ဗလရှင်ငုံဆေးပြားများ ဖြစ်သည်၊ ကျနော်တို့ ၇ နှစ် ၈ နှစ်အရွယ်လောက်မှာ အဖွားပါးစပ် တလှုပ်လှုပ်နဲ့ ရှိနေတတ်တာ သတိပြုမိသွားသည်၊ ဒါနဲ့ အဖွားကို ဝိုင်းလည်း မေး၊ ပါးစပ်ကိုလည်း အတင်းဟခိုင်းသည့်အခါ ဗလရှင်ဆိုတာ သိသွားသည်၊ ကျနော်တို့က စားချင်လို့ ပူဆာတော့ အဖွားက ဒါကလေးတွေအတွက် မဟုတ်ဘူးဟု မျက်လုံးပြူး၊ မျက်ဆံပြူးနှင့် မာန်မဲချင် ယောင်ဆောင်သည်၊ ဒါပေမယ့် အဖွားကို ကျနော်တို့ ညီအစ်ကိုတွေ မကြောက်ပါ၊ သူ့မြေးတွေကို ပြောမရတိုင်း မျက်လုံးကြီးပြူးပြီး စိတ်ဆိုးချင် ယောင်ဆောင်တတ်သည့် အဖွားက ကျနော်တို့အားလုံးအတွက်တော့ ချစ်စရာကောင်းသည့် အဖွားတစ်ယောက်သာ ဖြစ်ပါသည်၊ နောက်ပိုင်း အဖွား ဗလရှင်စားတာ မြင်တိုင်း ကျနော်တို့က ဝိုင်းပြီး တောင်းစားလွန်းတော့ တခါမှာ အဖွားက သူ့ရင်ဖုံးအင်္ကျီ အိတ်ကပ်လေးထဲမှ ဗလရှင်တောင့်လေးကို ထုတ်ပြီး သေးနိုင်သမျှ သေးအောင်ချိုးကာ ကျနော်တို့ ညီအစ်ကို သုံးယောက်ကို ဝေပေးသည်၊ 'နင်တို့တွေ ဗိုက်အောင့်မယ်၊ နောက်မကျွေးတော့ဘူး' ဟုလည်း ဆိုလိုက် သေးသည်၊ ဒါပေမယ့် ကျနော်တို့ရှေ့မှာ အဲဒီလို ဗလရှင် ထုတ်လိုက်တာက အဖွားရဲ့ မဟာအမှား ပဲဖြစ်သည်၊ ဗလရှင် ဘယ်မှာလဲ ဆိုတာ ကျနော်တို့ သိသွားခဲ့ပြီ၊ နောက်တစ်ရက်မှာတော့ ကျနော်တို့တွေ အဖွားကို ဝိုင်းပြီးကလိထိုးကာ အဲဒီဗလရှင် ထုပ်ကို လုယူကြသည်၊ အဖွားမှာ လုံချည်ကျွတ်မကျအောင် ထိန်းကိုင်ရင်းက 'ဟဲ့..ဟဲ့..ဟဲ့'ဆိုတာထက် ပိုပြီး မအော်လိုက်ရ၊ ကျနော်တို့ရဲ့ 'hit and run' ဗလရှင် အော်ပရေးရှင်းက စက္ကန့်ပိုင်း အကြာမှာပဲ အောင်မြင်သွားခဲ့သည်၊ အပြားကြီးတစ်ပြားကို ချိုးကာ ကျန်တဝက်ကို ကြမ်းပြင်ပေါ်ပစ်ချပြီး ကျနော်တို့ ထွက်ပြေးကြတော့ အဖွားက ဆူပူအော်ဟစ်လျက် ကျန်နေခဲ့သည်၊ နောက်ပိုင်းမှာ ကျနော်တို့သုံးယောက် သူ့အနားကပ်လာတိုင်း သူ့ရင်ဖုံးအင်္ကျီလေးကို ဖိကာ 'နင်တို့တွေနော်...'ဟုဆိုရင်း မျက်လုံးပြူး ပြီး ကြည့်နေတတ်သည်၊ ကျနော်တို့က သွားကျိုးလေးတွေ ကိုယ်စီဖြင့် မျက်နှာချိုသွေးကာ နားပူနားဆာလုပ်တော့လည်း အဖွားက အရည်ပျော် စမြဲပင်...၊

အဖွားအကြောင်းမှာ ချန်ထားလို့မရတာ တခုက ဘယ်ဖက်လက်သူကြွယ်မှ လက်စွပ်ကလေး ဖြစ်သည်၊ လက်စွပ်က ရွှေသားသက်သက် ဖြင့်သာ လုပ်ထားသော ကနုတ်၊ ပန်းခက်၊ ကျောက် ဘာတခုမှ မပါသည့် ဗြောင်လက်စွပ်လေး ဖြစ်သည်၊ အဖွားနှင့် အဖိုးတို့အကြောင်းကို တစ်ရက်မှာ အဖေက ခပ်သောသောဖြင့် ပြောပြခဲ့ဖူးပါသည်၊

အဖွားနှင့်အဖိုး အကြောင်းပါတော့ အဖွားက အတော်ငယ်သေးသည်ဟု ဆိုသည်၊ ၁၆ နှစ်၊ ၁၇ နှစ်သာသာ-တဲ့၊ အဖိုးက တော့ မုဆိုးဖို ဖြစ်သည်၊ အဖိုးရဲ့ အရင်အိမ်ထောင်ဖက်က စောစောစီးစီး တိမ်းပါးသွားချိန်မှာ အဖိုးက သားသမီး ၂ ယောက်နှင့် ၄၀ ဝန်းကျင်အရွယ် မုဆိုးဖို..၊ အလုပ်အကိုင်က အထက်တန်းပြ ကျောင်းဆရာ၊ အဖိုးရဲ့ ဦးလေးက မြန်မာ-အင်္ဂလိပ် အဘိဓာန် ကို ပြုစုခဲ့သည့် ဦးထွန်းငြိမ်း...၊ ဒါ့ကြောင့်မို့ပဲလားတော့ မသိ၊ ကျောင်းမှာ သူသင်သည့် ဘာသာရပ်တွေက အတော်တော့ အများသား၊ အင်္ဂလိပ်စာ၊ သမိုင်း၊ ပထဝီဝင်၊ သင်္ချာ...၊ ဒါ့အပြင် သူက အားကစား နည်းပြလည်း လုပ်လိုက်သေးသည်၊ ပြီးတော့ သူ့ခေတ်သူ့အခါက အထိုက်အလျောက် နာမည်ရှိသည့် ဂိုးသမား..၊

အဲဒီလို တောင့်တင်းကျန်းမာသည့် သက်လတ်ပိုင်း မုဆိုးဖို ကျောင်းဆရာက သူ့အတန်းထဲက ကျောင်းသူလေးကို မျက်စိ ကျနေခဲ့သည်၊ စာသင်ချိန်တွေမှာ ထိုကျောင်းသူလေးအပေါ် ဆရာသိက္ခာကို ထိန်းရင်း ပိုးပန်းနေခဲ့လိမ့်မည်ဟု ကျနော် ခန့်မှန်း ကြည့်မိပါသည်၊ ဒါပေမယ့် ကျောင်းသူလေးကတော့ ဘာမှ မသိရှာပါ-တဲ့၊ တစ်ရက်မှာတော့ အဆိုပါ ဆရာလေးက ပထဝီဝင် သင်ကြားနေခဲ့သည်၊ အတန်းရှေ့က ကျောက်သင်ပုန်းကြီးပေါ်မှာ ကမ္ဘာ့မြေပုံကြီး ချိတ်ကာ တိုက်ကြီးများနှင့် နိုင်ငံတွေအကြောင်း ရှင်းပြနေသည်၊ တတန်းလုံးလည်း ငြိမ်ပြီး နားထောင်လို့...၊ ဒီလိုနဲ့ ဆရာလေးက သင်ကြားနေရင်း မင်းလမ်းအတိုင်း စကားတပြောပြောဖြင့် လျှောက်လာကာ အတန်းရဲ့ နောက်ဆုံးဖက်ကို ရောက်လာသည်၊ အဲဒီနေရာ အရောက်မှာ ဆရာလေးက စာသင်တာကို ရုတ်တရက် ရပ်လိုက်ရင်း အတန်းရှေ့ ကျောက်သင်ပုန်းဖက်ကို လှည့်ပြီး မျက်နှာမူ လိုက်သည်၊ တဆက်တည်း သူသဘောကျနေသည့် ကျောင်းသူလေးရဲ့ နာမည်ကို ခေါ်လိုက်သည်၊ ပြီးတော့...

" အဲဒီ မြေပုံပေါ်မှာ ဆရာ့ကို ကိုလံဘီယာ နိုင်ငံ ဘယ်နေရာမှာလဲလို့ ထောက်ပြပါဦး..."ဟု မေးသည်၊

ကျောင်းသူလေးကလည်း ခပ်သွက်သွက်ပဲ အတန်းရှေ့ထွက်ကာ ကိုလံဘီယာ နိုင်ငံကို မြေပုံပေါ်မှာ ပြလိုက်သည်၊ ပြီးတော့ သူ့နေရာကို လှည့်ပြန်အလာမှာ ဆရာလေးကို လှမ်းအကြည့်၊ အလုံးစုံကို နားလည်သွားပြီး ရှက်ရွံ့ထူပူ သွားတော့သည်၊ တကယ်တော့ အဖိုးက လူလည်ကျကာ အဖွားကို လမ်းထ,လျှောက်ခိုင်းပြီး ဟိုးနောက်ဆုံးတန်းကနေ အသာရပ်ကြည့် နေခဲ့ခြင်းပဲ ဖြစ်ပါသည်၊ သူ စာလာသင်တိုင်း ထိုင်လျက်သာ မြင်နေခဲ့ရသည့် အဖွား၏ cat walk အလှကို ကိုလံဘီယာအား ခုတုံးလုပ်ကာ ခံစားခဲ့ခြင်း ဖြစ်သည်၊ အဲဒီအချိန် အဖွားကသာ ကိုလံဘီယာ ဘယ်မှာလဲ မသိပါဟု ဆိုလာလျှင်လည်း တခြားနိုင်ငံတစ်ခုကို သူ မေးဦးမှာ သေချာပါသည်၊ အဖွားကကော...၊ သူကတော့ ကိုလံဘီယာကို ပြအပြီး ပြန်လှည့်လိုက်တဲ့ အဲဒီ စက္ကန့်ပိုင်းလေးမှာပဲ အဖိုးရဲ့အကြံကို သဘောလည်းပေါက်၊ ရှက်လည်းရှက်သွားခဲ့သည်-တဲ့၊ ကမ္ဘာ့မြေပုံပေါ်မှာ ကိုလံဘီယာကို ရှာတွေ့လိုက်သလို အဖိုးရဲ့ မျက်ဝန်းတွေထဲမှာလည်း အချစ်ကို ရှာတွေ့သွားခြင်းပါပဲ..၊

အဖွားရဲ့ နာမည်က မဆန်းမြိုင်၊ အဖိုးရဲ့ နာမည်က ဖိုးသော်ဒါ၊ သူတို့နှစ်ယောက် လက်ထပ်ကြတော့ လက်ထပ်လက်စွပ် အတွင်းမှာ စီအမ်ဒီ (CMD) ဟု ထွင်းထားလိုက်သည်၊ ကိုလံဘီယာ ဖူးစာမို့ ကိုလံဘီယာ မြိုင်ဒါ (Columbia Myaing Dar) တဲ့..၊

ကျနော် ၁ နှစ်ကျော်ကျော် အရွယ်မှာပဲ အဖိုးက ဆုံးသွားခဲ့သည်၊ သူ ကျနော့်ကို အရမ်းချစ်သွားခဲ့တယ်ဆိုတာ အဖေတို့ ပြန်ပြောပြလို့ သိရပေမယ့် ကျနော့်ရဲ့ မှတ်ဥာဏ်မှာတော့ သူနဲ့ပတ်သက်ပြီး ဘာမှ ပြက်ပြက်ထင်ထင် မကျန်ရစ်ခဲ့၊ အဖွားကတော့ ၉၈ ခုနှစ်မှာ ဆုံးသွားသည်၊ ကျနော်တို့တတွေ အတင်းပူဆာပြီး သူ့လက်စွပ်လေးကို တောင်းကြည့်တုန်းက အဖွားက ရှက်ရှက်နဲ့ ဖြုတ်ပေးပါသည်၊ လက်စွပ်အတွင်းထဲမှာတော့ သူတို့ လက်ထပ်သည့် ရက်စွဲနှင့် စီအမ်ဒီ ဟူသည့် အင်္ဂလိပ် အက္ခရာလေး သုံးလုံး၊ ကြာတော့ ကြာခဲ့ပါပြီ၊ တခါတရံမှာ လက်ထပ်လက်စွပ်လေးတွေ အကြောင်း ပြောဖြစ်ရင် အဖိုးနဲ့ အဖွားကို ကျနော် သတိရမိနေတုန်း ပါပဲ။ ။


ညီလင်းသစ်
၂၈ ဖေဖော်ဝါရီ၊ ၂၀၁၁

25 February 2011

ပျော်ရွှင်စွာ ရှုံးနိမ့်ခြင်း


ဒီနေ့ ကျနော်ရှုံးသွားတယ်၊ မရှုံးတဲ့ အချိန်တွေ အတော်ကြီးကြာပြီးမှ အခုတခါ ရှုံးသွားပြန် တယ်၊ ကျနော်နဲ့ လုပ်ဖော်ကိုင်ဖက် တစ်ယောက် ဖြစ်တဲ့ ဒေါမနစ် (Dominique) နဲ့ ကစားတဲ့ ကြက်တောင်ရိုက်ပွဲမှာ ကျနော် ရှုံးသွားခဲ့ တာပါ၊

ဒေါမနစ်နဲ့ ကျနော်နဲ့က အဓိက ဌာနက တခုတည်းပေမယ့် ဌာနခွဲတော့ မတူပါဘူး၊ သူက ပင်မဓါတ်ခွဲခန်း ဖြစ်တဲ့ central lab မှာ လုပ်တယ်၊ သူနဲ့ကျနော် ကြာသပတေးနေ့တိုင်း ကြက်တောင်ရိုက် ကစားကြတယ်၊ နေ့လယ် ၁၁ နာရီ ခွဲကနေ ၁ နာရီခွဲ လောက်အထိ အားလပ်ချိန်ယူပြီး ကစားပါတယ်၊ ကြက်တောင်ကွင်းက ကျနော်တို့ရဲ့ အလုပ်ကနေ ၁၀ မိနစ်လောက် လျှောက်သွားလိုက်ရင် ရောက်တယ်၊ ကျောင်းရဲ့ အားကစားရုံထဲမှာ ရှိပါတယ်၊ အဲဒီမှာ ကျောင်းသား တွေကော၊ ဝန်ထမ်းတွေပါ လာကစားကြတယ်၊ ဒေါမနစ်က အရင်တုန်းက သူ့ရဲ့ဆရာနဲ့ ကစားနေကျပါ၊ ဒါပေမယ့် နောက်ပိုင်းမှာ သူ့ဆရာက ခါးနာတဲ့ ဝေဒနာ ခံစားနေရတာနဲ့ မကစား ဖြစ်တော့ဘူး၊ တစ်ရက်မှာ ကျနော်နဲ့ စကားစပ်မိ သွားရင်း စမ်းကစားကြည့်ရာကနေ နောက်တော့ ပုံမှန်နီးပါး တစ်ပတ်တခါ ကစားဖြစ်သွားတော့တယ်၊

ကျနော်တို့က အမြဲတမ်း ၃ ပွဲကစားပါတယ်၊ ဒီနေ့ကစားတော့ ပထမပွဲမှာ ကျနော်နိုင်တယ်၊ အမှတ် အပြတ်အသတ်နဲ့ နိုင်တာပါ၊ ဒုတိယပွဲမှာလည်း ကျနော်ကပဲ လက်ရည်အသာနဲ့ ဦးဆောင်ကစားနေခဲ့ပြန်တယ်၊ ဒါပေမယ့် တဝက်လောက် အရောက်မှာ သူ့ကို တချက်ကြည့်မိရင်း ကျနော့်ခေါင်းထဲ အရင်တုန်းက ပုံရိပ်တွေနဲ့ အတွေးတွေ အစီအရီ ဝင်ရောက်လာခဲ့တယ်၊

ကျနော်တို့ ပထမဦးဆုံး စ,ကစားကြတော့ ဒေါမနစ်ရဲ့ အဆင့်က ကျနော့်ထက် အများကြီး သာပါတယ်၊ ကျနော့်အတွက်တော့ အဲဒီအချိန်ထိ ကြက်တောင်ဆိုတာ ပျော်ပွဲစားထွက်ရင်း မြက်ခင်းပေါ်မှာ ရိုက်ကြတဲ့ ကစားနည်း သက်သက်ပါပဲ၊ ပိုက်မရှိ၊ စည်းမရှိနဲ့လေ..၊ ဒီကြားထဲ လေတိုက်ရင် လွင့်,လွင့်သွားသေးတယ်၊ ဆိုတော့ ကစားကြတဲ့ ပထမဦးဆုံး နေ့ရက်တွေမှာ ကျနော်ကချည်းပဲ အလူးအလှိမ့်ကို ခံရတာပါ၊ ရှုံး တာမှ ပွဲတိုင်းပဲ၊ တခါတလေဆို ဘဲဥကွဲရုံ တစ်မှတ် လောက်ပဲ ရတဲ့ပွဲတွေတောင် ရှိခဲ့တယ်၊ အဆိုးဆုံးက အသက်ရှူ မဝတာပဲ၊ လုပ်နေမကျတဲ့ အားကစားလည်း ဖြစ်ပြန်၊ ပြိုင်ပွဲဆိုတဲ့ stress ကလည်း ရှိနေပြန်တော့ အသက်ကို ပုံမှန်မရှူဘဲ အောင့်,အောင့် ထားမိတယ်၊ ကြာတော့ ပါးစပ်နဲ့ပဲ အသက်ကို အတင်းလုပြီး ရှူနေရတယ်၊ မောလွန်းလို့လည်း နှလုံးခုန်သံတွေက ရင်ဘတ်ထဲက ပေါက်ထွက် လုမတတ်ပါပဲ၊ ဘယ်လောက်များလဲဆို ပွဲပြီးလို့ ရေချိုး၊ အဝတ်စား လဲပြီးတာတောင် ရင်ဘတ်ထဲမှာ တဒိန်းဒိန်းနဲ့ အဲဒီ ရင်ခုန်သံတွေက မပျောက်ချင်သေးဘူး၊ ဘယ်သူမှ မကြားနိုင်လို့ တော်သေးတယ်၊ မဟုတ်ရင် ယောင်္ကျားတွေချည်းပဲ ရှိတဲ့ အဝတ်လဲခန်းထဲမှာ ဘယ့်နှယ့် လာပြီးရင်ခုန်နေရတယ်လို့..၊ တလွဲတွေ အထင်ခံရနိုင်တယ်...၊ :D

ဒီလိုနဲ့ ကျနော်ပထမဦးဆုံး စ,လုပ်တာက ကြက်တောင်ရိုက်ရင်း ဝင်သက်ထွက်သက် မှတ်တာပါပဲ၊ ကြက်တောင်ကို ဘယ်လိုရိုက် ရမလဲဆိုတာ မသင်ခင် အသက်ရှူနည်းကို အရင် သင်နေရတယ်၊ ဖြစ်ပုံများ၊ နဲနဲကြာတော့ တဖြည်းဖြည်းနဲ့ အဆင်ပြေလာတယ်၊ အဲဒီကမှ တဆင့်တက်ပြီး နည်းစနစ်ပိုင်းကို လေ့လာပါတယ်၊ အဲဒီ အားကစား ရုံကြီးထဲမှာ ဆရာနဲ့ သင်ချင်တဲ့ သူတွေအတွက်လည်း ကွင်းတွေသီးသန့် ရှိပါတယ်၊ ကျနော်တို့ နှစ်ယောက် ကစားလို့ပြီးရင် အဲဒီကွင်းတွေ ဘေးနားမှာသွားပြီး အကြောလျှော့ လေ့ကျင့်ခန်း လုပ်ရင်းနဲ့ ဆရာတွေ သင်ပြနေတာကို သွား,သွား လေ့လာပါတယ်၊ ဒီလိုနဲ့ ကြက်တောင်နဲ့ ကျနော် တစထက်တစ ပိုပြီး နေသားတကျ ရှိလာခဲ့တယ်၊ နောက်ပိုင်းမှာ ဒေါမနစ်နဲ့ ကျနော် လက်ရည်တူလာခဲ့တယ်၊ သူများတွေ သင်နေတာ သွားကြည့်၊ ကိုယ့်ဟာကိုယ် ပြန်ကျင့်ရင်းနဲ့ ကျနော် ကစားပါတယ်၊ ကစားရင်း ပြုပြင်၊ ပြုပြင်ရင်း ကစားဆိုပါတော့၊ အဲဒါတွေရဲ့ အကျိုးကျေးဇူးကို ၆ လလောက် အကြာမှာပဲ စပြီး ခံစားရ ပါတယ်၊ ဒေါမနစ်က ကျနော့်အပေါ် ရှုံးပွဲတွေ ဆက်လာရင်းက နောက်ဆုံးမှာ လုံးဝ မနိုင်တော့ဘူး၊ ကစားပွဲတိုင်းကို ကျနော့်စိတ်ကြိုက် ထိန်းပြီး လိုသလို ကစားလို့ရတဲ့ အခြေအနေထိ ရောက်လာခဲ့တယ်၊ ကြာသပတေးနေ့တိုင်း ကျနော်ကပဲ ၃ ပွဲဆက်တိုက် အမြဲနိုင်နေ တော့တယ်၊ အဲဒါဟာ အပတ်စဉ်ဆက်တိုက် ဖြစ်လာတော့ တခါမှာ သူက ပြောပါတယ်၊ 'အရင်တုန်းက ငါတို့နှစ်ယောက် လက်ရည်ညီနေတဲ့ အချိန်က ကစားလို့ တော်တော်ကောင်းခဲ့တာကွ၊ အခုတော့ မင်းက အများကြီး တက်သွားလို့ ငါနဲ့ကစားရတာ ပျင်းတောင် ပျင်းနေမယ်ထင်တယ်'-တဲ့၊

ဒီနေ့ ကစားတဲ့ ဒုတိယပွဲစဉ် တဝက်မှာ ဒီဖြစ်စဉ်တွေနဲ့ အဲဒီစကားလေးက ကျနော့်ခေါင်းထဲ ပြန်ဝင်လာခဲ့တာပါ၊ အရင်တုန်းက ကျနော့်ကို ကြိုက်သလို နိုင်နေခဲ့တဲ့ လူတစ်ယောက်၊ ကျနော့်ထက်လည်း အသက်အရွယ်အားဖြင့် ပိုကြီးပြီး ကြက်တောင်ကိုလည်း ကျနော့်ထက်စောပြီး ကစားခဲ့သူ တစ်ယောက်၊ အခုတော့ သူ့မှာ နိုင်ပွဲမရှိခဲ့တာ လေးငါးလ လောက်တော့ ကြာနေပါပြီ၊ သူလည်း အရင်တုန်းကလို ပြန်နိုင်ချင်မှာပေါ့၊ ပွဲပြီးတိုင်း သူများကိုပဲ Bravo တို့၊ Well done တို့ ပြောနေခဲ့ရတာ..၊ သူလည်း တခါတလေ ပြန်ပြီး အပြောခံချင်မှာပေါ့ လို့ကျနော် တွေးမိပါတယ်၊ ပြီးတော့ ဒေါမနစ်က ရှုံးပေမယ့် ပြိုင်ဖက်ကို ညှိုးတတ်တဲ့၊ အပြစ်ရှာတတ်တဲ့ bad loser မဟုတ်ပါဘူး၊ အလုပ်မှာ လည်း ခဏခဏ တိုင်ပင်ရတဲ့ လုပ်ဖော်ကိုင်ဖက်ကောင်း တစ်ယောက်ပါ၊ ကဲ,ဒီတော့..သူ့ကို တခါတလေများ ဘာဖြစ်လို့ အနိုင် မပေးနိုင်ရမှာလဲ ဆိုပြီး ကစားတဲ့နှုန်းကို ကျနော် မသိမသာ လျှော့ချလိုက်ပါတယ်၊ သူ့နောက်က ၂ မှတ်၊ ၃ မှတ် အကွာလောက်နဲ့ ကျနော်လိုက်ကစားနေလိုက်တယ်၊ ဒီ ဒုတိယပွဲ သူနိုင်သွားတယ်၊ ကျနော်က သူ့ကို လက်ဆွဲ နှုတ်ဆက်ရင်း Bravo လို့ ပြောလိုက်တော့ သူက 'ငါ့အတွက် မင်းလျှော့ကစားပေးတာ ကျေးဇူးတင်ပါတယ်ကွာ'လို့ ပြန်ပြောတယ်၊ သူ ရိပ်မိနေပုံပဲ၊

ကျနော့် လုပ်ရပ်က သူ့အတွက် သိပ်မကောင်းဘူးဆိုတာ ချက်ချင်းပဲ သဘောပေါက်လိုက်တယ်၊ သူ ကျနော့်ကို ရှုံးပေမယ့် သူ့အစွမ်းနဲ့သူ အစွမ်းကုန် ကစားခဲ့တာဖြစ်လို့ ဖြေသာပါတယ်၊ အခု ကျနော် လျှော့ပေးမှ သူက အနိုင်ရမယ့် အဖြစ်ဆိုတော့ သူ့သိက္ခာ၊ သူ့ လူစွမ်းလူစကို စော်ကားရာ၊ သူ့ကို မလေးစားရာ ရောက်နေပြီလို့ ကျနော် နားလည်လိုက်တယ်၊ ဒါပေမယ့် ဒီနေ့မှာမှ ကျနော်ကလည်း သူ့ကို တကယ်ပဲ နိုင်စေချင်နေ ခဲ့တာပါ၊ သူလည်းမသိစေဘဲ သူ့ကို အနိုင်ပေးလို့ရမယ့် နည်းလမ်းကို တတိယနဲ့ နောက်ဆုံးပွဲ အစမှာပဲ ကျနော်တွေ့လိုက်တယ်၊

ကျနော့်ရဲ့ ကစားနှုန်းကို ပြန်တင်လိုက်တယ်၊ ပြီးတော့ ကျနော် သိပ်မကျွမ်းကျင်သေးတဲ့ နည်းစနစ်တချို့ကို အသားပေးပြီး ကစားကြည့်တယ်၊ ဥပမာ- လေထဲမှာ မြောက်နေတဲ့ ကြက်တောင်ကို ရိုက်ချလိုက်ဖို့ အနေတော် ဖြစ်နေပေမယ့် တဖက်က ပိုက်နောက်နားမှာ ဒေါမနစ်က ရပ်နေတဲ့အခါ ကြက်တောင်ကို ပိုက်ကျော်ရုံလေးပဲ ကပ်ပြီး ချပေးလိုက်တယ်၊ ကြက်တောင်က ပိုက်မကျော်ရင် ဒေါမနစ်ပဲ အမှတ်ရမှာ ဖြစ်သလို ကျော်သွားတော့လည်း သူက အဲဒီနားမှာ အဆင်သင့်ဆိုတော့ ကျနော့်ဖက်ကို အလွယ်တကူ ပြန်ရိုက်ချလို့ ရပါတယ်၊ ဆိုတော့ ကျနော်က သူ့ကို အတင်းကြီး လျှော့ပေးနေတာမျိုးလည်း မဖြစ်တော့ဘူး၊ ပြီးတော့ ကျနော် လက်ပြန်ရိုက်ရမယ့် အခြမ်းကို မသိမသာလေး ဖွင့်ပေးထားလိုက်တာမျိုးပေါ့၊ သူက အဲဒီဖက်ကို ချပေးလိုက်တဲ့အခါ ကျနော့်အတွက် လက်ပြန်ရိုက်ရ လို့ ပိုပြီးခက်ခဲမယ်၊ ဒါပေမယ့် ရအောင်ရိုက်နိုင်ရင် ကျနော့်အတွက် လေ့ကျင့်ပြီးသား ဖြစ်လိမ့်မယ်၊ မရရင်လည်း ဒေါမနစ်က အမှတ်ရမှာ ဖြစ်လို့ ကိစ္စမရှိပါဘူး၊ ဒီလိုနည်းတွေနဲ့ ကစားလိုက်တာ ဒီပွဲကိုလည်း သူပဲ နိုင်သွားတော့တယ်၊ ဒီတခါ ကျနော်က ပြုံးပြီး လက်ဆွဲနှုတ်ဆက်ရင်း good job လို့ ပြောတော့ သူက ကျေနပ်တဲ့အပြုံးနဲ့ 'ကျေးဇူးပဲ'တဲ့၊

တကယ်တော့ ကျနော်တို့ ကစားတယ်ဆိုတာက ဘာပြိုင်ပွဲမှ မဟုတ်ပါဘူး၊ ကိုယ်လက်လှုပ်ရှားဖို့ အတွက်ပဲ ရည်ရွယ်တာပါ၊ သူ ဆက်တိုက် ရှုံးနေလို့ ဘာမှ မဖြစ်သလို ကျနော်ချည်းပဲ နိုင်နေတော့လည်း ဘာမှ မထူးခြားပါဘူး၊ အပြင် ပြန်ထွက်လာတာနဲ့ ကျနော်တို့ မေ့လိုက်ကြမှာပါပဲ၊ ဒါပေမယ့် ကစားနေစဉ် ခဏမှာတော့ သူသူကိုယ်ကိုယ် အနည်းဆုံး တခါတလေပဲ ဖြစ်ဖြစ် နိုင်ချင်ကြမှာပါ၊ ကစားကွင်းကနေ အဝတ်လဲခန်းဖက် လျှောက်လာတော့ ကျနော်ပဲ စိတ်ထင် လို့လား မသိဘူး၊ သူ့ရဲ့ မျက်မှာပေါ်မှာ ငါအရင်လို ကစားလို့ ရသေးသားပဲ ဆိုတဲ့ ကျေနပ်အားရတဲ့ အရိပ်အယောင်လေး ဖြတ်ကနဲ တွေ့လိုက်ရသလိုပဲ၊ ကျနော်ကကော...၊ အင်း, ကျနော်ကတော့ ရှုံး သွားခဲ့တယ်၊ ဒါပေမယ့် ပျော်တယ်...။


ညီလင်းသစ်
၂၄ ဖေဖော်ဝါရီ၊ ၂၀၁၁

22 February 2011

ကိတ်မုန့်တစ်လုံး၏ ရှူတင်


ဒီဗီဒီ အခွေတွေနဲ့ ရုပ်ရှင်ကြည့်တဲ့အခါ ကျနော်သဘောကျတာ တစ်ခုရှိပါတယ်၊ အဲဒါက ဇတ်ကားရဲ့ တချို့ဇတ်ဝင်ခန်း တွေကို ဘယ်လို ရိုက် ခဲ့ကြသလဲဆိုတာ မှတ်တမ်းတင်ထားတဲ့ အပိုင်းလေးပါ၊ ဒီဗီဒီတိုင်းမှာတော့ မပါ,ပါဘူး၊ ပါတဲ့ အခွေ တွေမှာဆိုရင် ဘိုးနပ်စ် ခေါင်းစဉ်အောက်မှာ တွေ့ရတတ်ပါတယ်၊ တခါတလေတော့လည်း ဒါရိုက်တာက စကားပြောပြီး ရှင်းပြတာ၊ တခါတခါတော့ ဘေးကနေ ကင်မရာ အပိုတစ်လုံးကနေ လိုက်ရိုက်ထားတာ၊ တခါတခါတော့ ဇတ်ဝင်ခန်းကို ပြနေရင်းနဲ့ နောက်ခံ စကားပြောနဲ့ ရှင်းပြတာ.. စသဖြင့် ပုံစံအမျိုးမျိုး တွေ့ရတတ်တယ်၊ ဒါ့အပြင် တချို့ဇတ်ကားတွေမှာ မိတ်ကပ်ဘယ်လို လိမ်းခဲ့လဲဆိုတာပါ ပြထားတတ်တယ်၊ အထူးသဖြင့် special effect တွေပါတဲ့ အက်ရှင်ကားတွေမှာပေါ့၊ ဒါမှ မဟုတ်လည်း မကောင်းဆိုးဝါးတွေ၊ လူမဟုတ် တိရိစ္ဆာန်မဟုတ် အကောင်တွေကို ဘယ်လို ကွန်ပြူတာနဲ့ ဖန်တီးသလဲဆိုတာ အကြမ်းဖျင်း ရှင်းပြတာမျိုးလည်း ရှိပါတယ်၊ ဒါတွေကို ခြုံငုံပြီး making of လို့ ခေါ်ကြ ပါတယ်၊

အဲဒီလို making of တွေ ပါလာပြီဆိုရင် တတ်နိုင်သလောက် ကျနော်ကြည့်လေ့ ရှိတယ်၊ ဒါတွေကို ဘယ်လိုလုပ်သလဲ ဆိုတာ စိတ်ဝင်စားတာ အဓိကပေါ့လေ၊ ဒါပေမယ့် စိတ်ဝင်စားဖို့ ကောင်းတဲ့ နောက်တစ်ချက်လည်း ရှိပါသေးတယ်၊ အဲဒါက ဒီဇတ်ဝင်ခန်းကိုပဲ ခုနတုန်းက ရုပ်ရှင် ထဲမှာ နင့်နင့်နဲနဲ ခံစားခဲ့သလောက် making of မှာ ပြန်တွေ့တော့ အမြင် ပြောင်းသွားတာပါ၊ ဇတ်ဝင်ခန်းထဲမှာ ဥပမာ မင်းသားနဲ့ မင်းသမီး သေလုမျောပါး ခွဲရခါနီး ကြေကွဲကြတဲ့ အခန်း ဆိုပါစို့၊ မင်းသားက ညသန်းခေါင် တောအုပ်အလယ်မှာ လဲလို့၊ တကိုယ်လုံးလည်း ရွှံ့တွေဗွက်တွေ ပေလူးနေတဲ့အပြင် ရင်ဘတ်မှာလည်း လူဆိုးတွေပစ်သွားတဲ့ ကျည်ပေါက်ရာတွေနဲ့၊ သူ့ကို မင်းသမီးက ပွေ့လို့...၊ ဒီကြားထဲ မိုးက သူတို့ နှစ်ယောက်အပေါ်ကို သဲကြီးမဲကြီး ရွာနေသေးတယ်၊ နှစ်ယောက်လုံးရဲ့ မျက်ရည်တွေက မိုးနဲ့အပြိုင် ပါးပြင်ပေါ်မှာ..၊ မင်းသားက အသက်ငင်နေလို့ နှုတ်ခမ်းတွေက တဆတ်ဆတ်တုန်လို့၊ မင်းသမီးက ဝမ်းနည်းလွန်းလို့ ကိုယ်လုံးလေး တုန်ပြီး တသိမ့်သိမ့်ရှိုက် လို့..၊ နောက်ခံ တီးလုံး မတိုးမကျယ်နဲ့ ကံကြမ္မာရဲ့ အရက်စက်ဆုံးအခန်း၊ ဒီလို အခန်းမျိုးကို ကြည့်ရတဲ့အခါ ကျနော်တို့ အနည်းနဲ့အများ ဝမ်းနည်းမိမှာပါ၊ အထူးသဖြင့် ဇတ်လမ်းကို ဟိုးအစကတည်းက ထဲထဲဝင်ဝင် ကြည့်လာခဲ့ရင် ပိုပြီး နက်ရှိုင်းလိမ့်မယ်၊

ပြီးသွားတော့ ဒီအခန်းကိုပဲ making of မှာ ပြန်ကြည့်မယ်၊ အခုတော့ ပြောင်းသွားပြီ၊ မင်းသားက ရွှံ့ထဲမှာ ထိုင်ရင်း ဒါရိုက်တာ ညွှန်ကြား တာကို နားထောင်နေမယ်၊ သူ့ကို မိတ်ကပ်လိမ်းတဲ့သူက လိမ်းလို့၊ မင်းသမီးကလည်း တစ်ယောက် ယောက်ကို ဖုန်းဆက်နေမယ်၊ ရယ်လို့မောလို့၊ ကဲ, စမယ်ဆိုတော့ မင်းသမီးက မင်းသားကို ပွေ့လိုက်ပြီး နှစ်ယောက်လုံး မုဒ်သွင်းမယ်၊ အဲဒီအချိန်မှာ သစ်ပင်ပေါ်က အသင့်စောင့် နေတဲ့ တစ်ယောက်က မီးသတ်ပိုက်ကို ဖွင့်ချလိုက်မယ်၊ ကင်မရာက သူတို့ နဲ့ ၅ ပေအကွာကနေ ရိုက်နေမယ်၊ ဘေးမှာ ထီးမိုးပြီး ဝိုင်းကြည့်နေတဲ့သူတွေ အများကြီး၊ စက်ပစ္စည်းတွေက တပုံတခေါင်းနဲ့ ဓါတ်ကြိုးတွေကလည်း ရှုပ်ပွလို့၊ ခပ်လှမ်းလှမ်းကနေ ဒါရိုက်တာ က မော်နီတာကနေ အသေးစိတ်ကြည့်နေမယ်၊ ကဒ်လို့ အောက်လိုက်တဲ့ အချိန်နဲ့ မရှေးမနှောင်းမှာပဲ ဒါရိုက်တာက ချီးကျူးစကားပြောရင်း သူတို့ကို လှမ်းနောက်လိုက်မယ်၊ ရှူတင် တခုလုံး ဝိုင်းရယ်ကြမယ်၊ မင်းသားရော မင်းသမီးပါ မြေကြီးပေါ်က ထလာကြရင်း ရယ်နေကြမယ်၊ အခုတော့ မိုးလည်း တိတ် သွားသလို သစ်ပင်ပေါ်က မိုးနတ်မင်းလည်း မီးသတ်ပိုက်ကိုင်ရင်း ပြန်ဆင်းလာမယ်၊

ကျနော် ဆိုလိုတာက ဒီဇတ်ဝင်ခန်း တစ်ခုထဲကိုပဲ မြင်ထောင့်ပြောင်းသွားတာကိုပါ၊ အဓိက ကင်မရာက မင်းသားနဲ့ မင်းသမီး နှစ်ယောက်တည်းကိုပဲ ကွက်ပြီးပြတုန်းက ဝမ်းနည်းစရာ ကောင်းသလောက် ဒီကင်မရာကို ကျော်ပြီးလည်း ကြည့်လိုက်ရော ဒါဟာ အလုပ်,လုပ်နေကြတာပါလား ဆိုတာထက် ဘာမှထူးပြီး မခံစားရပါဘူး၊ အကူကင်မရာရဲ့ နေရာကနေ ကြည့်လိုက်တော့မှ ဝမ်းနည်းကြေကွဲခြင်းက ကွက်ကွက်ကလေးပဲဆိုတာ တွေ့ရတယ်၊ အညှိုးတကြီးနဲ့ ရွာချနေတဲ့ မိုးဆိုတာလည်း ၁၀ ပေပတ်လည်ထက် မပိုပါဘူး၊ ဒီစက်ဝိုင်းရဲ့ အပြင်မှာတော့ လူပေါင်းများစွာက လုပ်စရာ ရှိတာတွေကို လုပ်နေကြတယ်၊ ဘယ်သူမှ မင်းသားမင်းသမီးနဲ့အတူ လိုက်ပြီး မငိုကြပါဘူး၊ တခါတခါ ကျနော်တို့ရဲ့ နေ့စဉ်ဘဝမှာလည်း အဓိက ကင်မရာက ပြသလောက်ကလေးပဲ မြင်ရတဲ့အခါ တချို့အဖြစ်အပျက်တွေက လတ်တလော မှာ လှုပ်ရှား၊ ရိုက်ခတ် တတ်လွန်းပါတယ်၊ ငိုစရာပဲ ဖြစ်ဖြစ်၊ ရယ်စရာပဲ ဖြစ်ဖြစ်ပေါ့၊ ဒီကာလရဲ့ အလွန်၊ အချိန်အပိုင်း အခြား တခုကြာတဲ့အခါ အကူ ကင်မရာရဲ့ နေရာကနေ ပြန်ကြည့်တော့မှ အဲဒီတုန်းက ရွာနေခဲ့တဲ့ ဒုက္ခမိုးဟာ ၁၀ ပေ ပတ်လည်ထက် မပိုပါလားဆိုတာ သတိပြုမိ တတ်ပါတယ်၊ အဲဒီမိုးရဲ့ အောက်မှာ သရုပ်ဆောင်သူတွေက ကြေကွဲ သလောက်၊ ဘေးပတ်ဝန်းကျင်မှာ လောက,ကတော့ လည်ပတ်မြဲပါပဲ၊ အဆုံးကြတော့လည်း ဒီရှူတင်သိမ်းပြီး အားလုံးက နောက်ရှူတင်ကို ထွက်သွားကြမှာပဲ မဟုတ်လား..၊ အဲဒါတွေကြောင့်လည်း behind the scene ကိုပြတဲ့ making of တွေကို ကျနော် ကြိုက်မိတာ ထင်ပါတယ်၊

အောက်က ဓါတ်ပုံတွေကတော့ ပြီးခဲ့တဲ့တစ်ပတ်က ကျနော့်ရဲ့ မွေးနေ့ကိတ်လေးကို ရိုက်တုန်းက setup ဓါတ်ပုံတွေပါ၊ ကိတ်မုန့်လေးက သူ့ချည်းပဲ ကြည့်ခဲ့တုန်းက အထိုက်အလျောက် ချစ်စရာကောင်းသလောက် အခုလို making of မှာ လည်းကျရော သူ့ပတ်ဝန်းကျင်က အနုပညာမဆန်တာကို သတိထားမိမှာပါ၊ တကယ်ပါ...၊ တခါတခါ အဓိက ကင်မရာ ရှေ့မှာ သရုပ်ဆောင်ရတာ သိပ်မောလွန်းတဲ့အခါ ဒုတိယ ကင်မရာနောက်ကို ခဏလေးပဲ ဖြစ်ဖြစ် သွားရပ်ပြီး ရှူတင် တစ်ခုလုံးကို ကြည့်,ကြည့်ပါ၊ အနည်းဆုံးတော့ မိုးရွာနေတာ ကွက်ကွက် ကလေးပဲ ဆိုတာ မြင်မိမှာပါ...။ ။


(၁)
Photobucket


(၂)
Photobucket


(၃)
Photobucket


ညီလင်းသစ်
၂၂ ဖေဖော်ဝါရီ၊ ၂၀၁၁

20 February 2011

ဆစ်ပိုင်းတီးခေါက် သုံးဆယ့်ခြောက်


မွေးနေ့ကိတ်လေးကို ပြင်ဆင်ပြီးတော့ ဘလော့ဂ်မှာ တင်တော့ ကျနော့်ရည်ရွယ်ချက်က ရိုးရိုးလေးပါပဲ၊ ဒီ ပစ္စည်းလေးတွေကို ရေကြည့်လိုက်တာနဲ့ ကျနော်ချန်ထားခဲ့တဲ့ ပြက္ခဒိန်တွေကို သိနိုင်ဖို့ပါ၊ ပဟေဠိအဆင့်ထိ မရည်ရွယ်ပါဘူး၊ ကိုယ့်ဟာနဲ့ ကိုယ်တော့ တွက်ရေးနဲ့ စက်သူဌေး ဖြစ်နေခဲ့ပေမယ့် ကွန်မန့်တချို့ ဖတ်လိုက် တဲ့ အချိန်ကျမှ တခုခုတော့ လွဲနေပြီလို့ သဘောပေါက်တယ်၊ အဲဒါက ချော့ကလက်ကို တစ်ချောင်းလုံး ယူမှာလား၊ တစ်ဆစ်ချင်း ယူမှာလား ဆိုတာပဲ၊ ဒီကြားထဲ ပိုဆိုးတာက ညီငယ်မောင်မျိုးရဲ့ အတိတ်စိမ်းအရ ဘယ်လိုပဲယူယူ ၂ လုံးပေါင်းက ၉ ဂဏန်း ကျနေသေးတယ်၊ ၉ နှစ်လျော့လည်း နည်းလားဆိုပြီး ခပ်တည် တည်နဲ့ နေချင်ပေမယ့် အများစုက သိထားတာကြောင့် ခေါင်းစဉ်ကို အခုလိုပဲ တပ်လိုက်ရပါတော့တယ်၊

ဆယ်စုနှစ် ၃ ခုခွဲ ကျော်ကို ဖြတ်ခဲ့ပြီးတဲ့နောက် ဒီနှစ်မွေးနေ့မှာ ကုန်လွန်ခဲ့တဲ့ အဲဒီနှစ်တွေ အကြောင်း နဲနဲ ပြန်စဉ်းစား ဖြစ်ပါတယ်၊ အခြားအခြားသော လူများစွာလို ပါပဲ၊ ကျနော်လည်း အမြင့်တွေ အနိမ့်တွေ၊ အရယ်တွေ အငိုတွေ၊ အချစ်တွေ အလွမ်းတွေ၊ အနိုင်တွေ အရှုံး တွေနဲ့ ချီတက်ခဲ့တာပါပဲ၊ ဒါကိုမှ ဆယ်စုနှစ် အလိုက် ယေဘုယျသတ်မှတ်ကြည့်တော့ အခုလိုတွေ့ပါတယ်...၊

ဝ မှ ၁၀ နှစ် (ချောကလက်)

လောကကြီးထဲ စ,ရောက်တဲ့ အစောပိုင်းနှစ်တွေက သိပ်ချိုမြိန်တယ်၊ ကလေးပီပီ တီတီတာတာနဲ့ ချစ်စရာ ကောင်းတယ်၊ ကျနော်ငယ်ငယ်က ဝဝတုတ်တုတ်ကလေးမို့ အားလုံးက ဝိုင်းချစ်ကြတယ်၊ စကားတတ်တယ်၊ ကျောင်းနေချိန်မှာလည်း အပူအပင်ကင်းကင်းနဲ့ ပျော်ရွှင်ရတဲ့ ဘဝလေး...၊ သွက်သွက်လက်လက်နဲ့မို့ မိဘ၊ ဆရာက အားကိုးရတဲ့၊ ချစ်ရတဲ့ ကလေး,လေးပေါ့၊ ဘဝဟာ ချော့ကလက်လိုပဲ မွှေးအီ, ချိုမြတယ်၊ အရသာ ရှိတယ်၊ လူတကာက လိုလားကြတယ်...၊


၁၀ မှ ၂၀ နှစ် (ငရုတ်သီး)

ဆယ်ကျောက်သက်တို့ ထုံးစံ စူးစမ်းမှုတွေက နေရာယူလာခဲ့တယ်၊ လူကြီးတွေများ ပူပန်ဖို့၊ ချုပ်ချယ်ဖို့ပဲ တွေးနေတာပဲ ဆိုတဲ့အမြင်မျိုးတွေ စ,ဝင်တယ်၊ တော်လှန်ချင်တဲ့ တွန်းလှန်ချင်တဲ့ အတွေးတွေ စိုးမိုးတယ်၊ ငါဟာ လောကကို ပြောင်းလဲဖို့ မွေးလာတာ ဆိုတာမျိုး သွေးနားထင် ရောက်ချင်တယ်၊ ရှင်သန်ရတဲ့ ခေတ် ကိုကလည်း အလှုပ်ရှားဆုံး အချိန်မို့ ဟိုဝါဒ၊ ဒီဝါဒတွေ မတောက်တခေါက် မြည်းစမ်းကြည့်တယ်၊ အမြင်မတူ တဲ့ စကားပွဲတွေမှာ အသုံးချ ကိုင်ပေါက်နိုင်ဖို့ ကြီးကျယ်တဲ့ စကားလုံးတွေကို အာဂုံဆောင်နိုင်ဖို့ ကြိုးစား တယ်၊ လူတကာနဲ့ စကားနိုင်လုရတာ ပျော်နေတယ်၊ တွန်းတွန်းတိုက်တိုက်နဲ့ ဘဝမို့ 'စပ်' တယ်၊ အများစုက ရှောင်ကြတယ်၊ ကြိုက်တယ်ဆိုတဲ့ သူတွေတောင်မှ အကန့်အသတ်နဲ့ စားကြတဲ့ ငရုတ်သီးလိုပါပဲ၊ စားနေစဉ် မှာရော စားပြီးသွားတော့ရော 'ပူ' တယ်၊


၂၀ မှ ၃၀ နှစ် (လိမ္မော်သီး)

လူငယ်ဘဝနဲ့ လူလတ်ပိုင်းဘဝ၊ ကျောင်းသားဘဝနဲ့ အလုပ်သမားဘဝ၊ စာအုပ်တွေထဲက သီအိုရီတွေနဲ့ လက်တွေ့ဘဝ... ဒီလို ကွာခြားမှု တွေကြောင့် တဖြည်းဖြည်း အစပ်လျော့လာခဲ့ပါတယ်၊ မလိုအပ်ဘဲ ရန်သူ မလိုချင်တော့ဘူး၊ အလုပ်,လုပ်ရတဲ့ဘဝကို နှစ်ခြိုက်လာတယ်၊ လိုက်လျောညီထွေ ဘယ်လိုနေရမလဲဆိုတာ နဲနဲ သဘောပေါက်လာခဲ့တယ်၊ ဘယ်ဟာက အဓိက၊ ဘယ်ဟာက သာမညဆိုတာ နားလည်လာတယ်၊ ပတ်ဝန်းကျင်နဲ့ သဟဇာတ ဖြစ်လာတာနဲ့အမျှ၊ လုပ်ငန်းခွင်မှာ အသုံးကျလာတာနဲ့ အမျှ နေရတာ ပျော်ဖို့ ကောင်းလာတယ်၊ ဘဝဟာ အရည်ရွှမ်းလာတယ်၊ မွှေးတယ်၊ အေးမြတယ်၊ လန်းဆန်းတယ်၊ အမောပြေစေ တယ်၊ လိမ္မော်သီး လိုပါပဲ...၊


၃၀ မှ ၃၆ နှစ် (ကော်ဖီ)

နို့ဖြစ်ဖြစ်၊ ခရင်မ်ဖြစ်ဖြစ် နဲနဲလောက် ထည့်သောက်မယ်ဆိုရင် စိမ့်စိမ့်လေးနဲ့ ကောင်းသလို၊ ဘလက်ခ် သောက်ရင်လည်း ကောင်းတဲ့နှစ်တွေပါပဲ၊ ဒီဖက်နှစ်တွေမှာ တချို့အရာတွေက အေးစက်စက် ကော်ဖီ တစ်ခွက်လို အနည်ထိုင် သွားကြတယ်၊ အချို့အရာတွေကတော့ ပူပူနွေးနွေးနဲ့ သောက်လို့ ကောင်းနေဆဲ ပါပဲ၊ ကော်ဖီတခွက်ကို စွဲလမ်းသလိုမျိုး ဘဝမှာ တမ်းတရတဲ့ အရာတွေလည်း ကျန်နေသေးတဲ့ အခြေအနေ ပါ၊ အချို့အကြောင်းအရာတွေ အပေါ်မှာ အိပ်ငိုက်သွားတတ်လို့ ကော်ဖီတစ်ခွက်နဲ့ ပြန်ပြန် နှိုးနေရတဲ့ ဘဝ ဆိုရင်လည်း မှန်ပါလိမ့်မယ်၊ တခါတခါတော့လည်း တွေးမိတယ်၊ ဘဝဟာ အက်စ်ပရက်ဆို တစ်ခွက်လိုပါပဲ၊ တစ်ငုံစာပဲ ရှိတယ်၊ ဒါပေမယ့် အဲဒီဟာကလေး လျှာပေါ်ကနေ လည်ချောင်းတလျှောက် စီးဆင်းသွားတာ လေးကိုပဲ တမ်းတ၊ စုံမက်နေရတာမျိုး မဟုတ်လား...၊

ဒီဓါတ်ပုံတွေ ရိုက်တော့ မအိမ်သူက မေးတာနဲ့ ရှင်းပြဖြစ်တယ်၊ ဒါနဲ့သူက အသက် ၆၀ လောက်ရောက်ရင်ကော ဘာတွေ ထပ်ထည့်ဦးမှာလဲ-လို့ မေးပြန်တယ်၊ ကျနော်က အဲဒီအခါကျရင် ကိတ်မုန့်လည်း ဆန့်မယ် မထင်တော့ပါဘူး လို့ ပြန်နောက်လိုက်တယ်၊ တခါကတော့ အဖေပြောဖူးတယ်၊ 'ငါ ငယ်ငယ်တုန်းက လူကြီးတွေ အသက် ၆၀ ဆိုရင် တော်တော့်ကို ကြီးပြီလို့ အောက်မေ့မိတာကွ၊ အခု ကိုယ့်အလှည့်ကျမှ ၆၀ ဟာ ဘာမှမဟုတ်သေးပါလားလို့ ခံစားရတယ်'တဲ့၊ သူ ၆၀ ပြည့်တုန်းက ပြောခဲ့တာပါ၊ ကျနော် ခပ်ငယ်ငယ် တုန်းက ဇော်ဝင်းထွဋ်ရဲ့ အသက် ၃၀ ပြည့် အထိမ်းအမှတ် ဆိုထားတဲ့ ဂျစ်ပစီမိုးတိမ် သီချင်း၊ ထူးအိမ်သင် က အသက် ၃၁ နှစ်ပြည့် အထိမ်း အမှတ်လုပ်တဲ့ စကားလုံး မရှိတဲ့ကောင်းကင် စတိတ်ရှိုး စတာတွေ ကြည့်ရင်း ငါလည်း ဒီအသက်လောက် ရောက်ရင် အတော်ကြီးပြီပဲ လို့ တွေးမိခဲ့ဖူးတယ်၊ အခုတော့လည်း အဖေပြောသလိုပါပဲ၊ လူဟာ အတ္တနဲ့ နွယ်လာတော့ တကယ်တမ်းမှာ ငယ်တုန်းပဲလို့ တွေးမိနေပြန်ရော၊ ဗီယက်နမ် စကားပုံလေးတစ်ခုကို စပ်မိလို့ သတိရပါတယ်၊ 'အသက်ဟာ ဥာဏ်ပညာ ကို မသယ်ဆောင်လာဘူး၊ အိုမင်းရင့်ရော်ခြင်းကိုသာ သယ်ဆောင်လာခဲ့တယ်'တဲ့၊ ရင့်ရော်လာတဲ့ ခန္ဓာကိုယ်နဲ့ အတူ ဆင်ခြင်တုံတရားနဲ့ ယှဉ်တဲ့ ရင့်ကျက်ခြင်းကိုပဲ ကျနော်လိုချင်မိပါတယ်...။ ။


ညီလင်းသစ်
၂၀ ဖေဖော်ဝါရီ၊ ၂၀၁၁

17 February 2011

မော်ဒန်ကိတ်


အစားအသောက် အကြောင်းတွေ၊ ချက်နည်းပြုတ်နည်း အကြောင်းတွေကို ပုံနဲ့တကွ တင်တဲ့ ဘလော့ဂ်တွေကို ရောက်သွားရင် ခံစားချက် ၂ မျိုးနဲ့ ပြန်,ပြန်လာရလေ့ ရှိပါတယ်၊ ပထမတစ်ခုက ဗိုက်ဆာတာ ဖြစ်ပြီးတော့ ဒုတိယ တစ်ခုကတော့ (နဲနဲ) အားကျတာလို့ ပြောရမယ် ထင် တယ်၊ :) ကျနော်လည်း တခါတခါ အဲဒီလို ချက်တတ်ချင်လိုက် တာ...၊

ဒီနေ့ ညနေတော့ ကိတ်မုန့်လေး တစ်ခုလုပ်ဖြစ်ပါတယ်၊ ကိတ်မုန့်လုပ်တာပါ၊ ဖုတ်တာ မဟုတ်ပါဘူး၊ ဆိုင်က အသင့်ရောင်း တဲ့ ကိတ်မုန့်တစ်လုံးကိုဝယ်ပြီးတော့ ကိုယ်လုပ်ချင်တာ လုပ်ပစ်လိုက်လို့ ကိတ်မုန့်လုပ်တာလို့ ပြောတာပါ၊ ပုံမှန် လုပ်ရိုးလုပ်စဉ်အတိုင်း ဆိုရင်တော့ အဲဒီပေါ်မှာ ဖယောင်းတိုင်လေးတွေ အစီအရီ ထွန်းရမှာပါ၊ ဒီနေရာမှာ ကြားဖူးတဲ့ ဟာသလေးတစ်ခုကို ပြောပြရဦးမယ်၊ အသက်အပိုင်းအခြား တစ်ခုကို ရောက်လာပြီ ဆိုတဲ့အခါ မွေးနေ့ကိတ်ပေါ်မှာ ဖယောင်းတိုင်တွေ ထွန်းတော့မယ်ဆိုရင် ဘေးမှာ မီးသတ်ဘူးတစ်ဘူး အဆင်သင့် ရှိပါစေ-တဲ့၊ များလွန်းတဲ့ ဖယောင်းတိုင်တွေကြောင့် မီးဘေး စိုးရိမ်ရလို့ပါ-တဲ့၊ အခုလည်း မီးရေးထင်းရေး ကာကွယ်တယ်ပဲ ဆိုဆို၊ မီးသတ်ဘူး မဆောင်ချင်ဘူးပဲ ပြောပြော ကိတ်မုန့်လေးတစ်လုံးတော့ ဒီလိုဖြစ်လာခဲ့ပါတယ်၊ ဟုတ်တယ်လေ...၊ ဖယောင်းတိုင်အစား ကျနော်က စိတ်ကူးထဲမှာ ရှိတာတွေကို အစားထိုးလိုက်တာကိုး၊ ခံစားကြည့်ပါဦး... ...နော့၊


(၁)
Photobucket
5DmarkII + EF 100mm f/2.8 Macro USM, 100mm, f/11, 1/200, iso100
Strobist: 1 flash YN-650 camera right, behind the subject, power 1/8, 1 flash Speedlite 430Ex camera left, in front of subject, power 1/16, diffused by DIY light tent, flash triggered by Yongnuo RF-602.

အောက်ခံ ကိတ်မုန့်က Mille feuilles လို့ခေါ်တဲ့ ကိတ်ပါ၊ မြန်မာလိုပြန်ရင်တော့ အရွက်တစ်ထောင်-တဲ့၊ အလွှာပါးပါးလေး တွေ အများကြီးနဲ့ လုပ်ထားလို့ ဒီလိုခေါ်တယ် ထင်တာပဲ၊


(၂)
Photobucket
5DmarkII + EF 100mm f/2.8 Macro USM, 100mm, f/11, 1/200, iso100
Strobist: same as above.

ဒီကိတ်မုန့်ကို အမျိုးအစား အရသာမတူတဲ့ အရာ ၄ မျိုးနဲ့ အလှဆင်ပါတယ်၊ ရှေ့ဖက်က ငရုတ်သီးနဲ့ ဘေးနှစ်ဖက်က လိမ္မော်သီးကတော့ အလွယ်တကူ မှတ်မိနိုင်ပါတယ်၊ အနောက်ဖက်မှာ နဲနဲကွယ်နေတာက ချော့ကလက်တောင့် ဖြစ်ပြီးတော့ အလယ်က ခရမ်းရောင် ဗူးကလေးတွေကတော့ Nespresso ကော်ဖီ capsule ပါပဲ၊ What else?


(၃)
Photobucket
5DmarkII + EF 100mm f/2,8 Macro USM, 100mm, f/2.8, 1/200, iso100
Strobist: 1 flash YN-650 camera right, in front of subject, power 1/16, 1 flash Speedlite 430Ex camera left, behind the subject, power 1/16, diffused by DIY light tent, flash triggered by Yongnuo RF-602.

ဒီပုံမှာတော့ အလင်းကို ပြောင်းပြန်ပေးထားပါတယ်၊ အပေါ်နှစ်ပုံမှာက ဘယ်ကနေညာ ထောင့်ဖြတ်ကို ဖလက်ရှ် ၂ ခုနဲ့ ပေးထားပြီးတော့ ဒီမှာကတော့ ညာကနေဘယ် ထောင့်ဖြတ်ကို ပြောင်းပြန်, ပြန်ယူထားတာပါ၊ ဒီပုံတွေအားလုံးရဲ့ ကင်မရာ setting က အတူတူပါပဲ၊ မတူတာက အလင်းရဲ့ အပြင်း၊ အပျော့ပါ...၊


(၄)
Photobucket
5DmarkII + EF 100mm f/2.8 Macro USM, 100mm, f/11, 1/200, iso100
Strobist: 1 flash YN-650 camera right, power 1/8, 1 flash Speedlite 430Ex camera left, slightly behind the subject, power 1/16, diffused by DIY light tent, flash triggered by Yongnuo RF-602.


အခုလို ကိတ်မုန့်လှီးတဲ့ ပွဲမျိုးတွေမှာ အနောက်တိုင်းဓလေ့က အားလုံးသိကြတဲ့အတိုင်း သိပ်မရင်းနှီးဘူးဆိုရင် လူတစ်ယောက်ကို အသက်မမေးကြပါဘူး၊ အထူးသဖြင့် အမျိုးသမီးတွေကိုဆို ပိုပြီးတောင် မမေးကြပါဘူး၊ ဒါပေမယ့် နဲနဲလည်း ရင်းနှီးတယ်၊ အတည်တဝက်၊ အရွှန်းတဝက်နဲ့လည်း နောက်ချင်တယ်ဆိုရင်တော့ How old are you? အစား How young are you? လို့ မေးတတ်ကြပါတယ်၊ ကျနော့်ကိုတော့ အဲဒီလို ယဉ်ကျေးဖွယ်ရာ အသုံးအနှုံးတွေနဲ့ မေးစရာ မလိုပါဘူး၊ တခါတည်းပဲ ပြောလို့ရပါတယ်၊ ကိတ်မုန့်ပေါ်က ပစ္စည်း ၄ မျိုးစုစုပေါင်းက ကျနော့် အသက်ပါပဲခင်ဗျား၊ :D ကဲ, ကြိုက်ရာကို သုံးဆောင်နိုင်ပါပြီ... ...။ ။


ညီလင်းသစ်
၁၇ ဖေဖော်ဝါရီ၊ ၂၀၁၁

14 February 2011

ထူးဆန်းသော မဲလ်ဝဲ


ဒီပို့စ်က ပြီးခဲ့တဲ့တစ်ပုဒ်ဖြစ်တဲ့ 'မတည်မြဲခြင်းတရားထဲမှ ဘလော့ဂိုစဖီးယား' ရဲ့ နောက်ဆက်တွဲပါ၊ အဲဒီပို့စ်ကို ရေးပြီးတော့ သူနဲ့ပတ်သက်ပြီး ကွန်မန့်တွေ ရပါတယ်၊ နောက်ထပ် စစ်ကြည့်တော့ အရင့်အရင်က ပို့စ်တွေမှာပါ နောက်မှ လာဖတ်တဲ့ သူတချို့က ကွန်မန့်တွေ ထားသွားတာ ကျနော် သတိထားမိတယ်၊ ပြီးတော့ ကျနော့် ဆိုဒ်ဘားမှာ နောက်ထပ် လင့်ခ်တချို့လည်း ထပ်ချိတ်လိုက်သေးတယ်၊ ဆိုတော့ ဒီနေ့မှာ ဘလော့ဂ်က အပြောင်းအလဲ၊ အလှုပ်အရှား ရှိသွားပြီ၊ ကောင်းပြီ၊ ဒါဟာ မဲလ်ဝ်စစ်ဖို့ အချိန်ကောင်းပဲဆိုပြီး ကျနော် စစ်ပါတယ်၊ မဲလ်ဝဲဆိုပြီး စာကြောင်းနီ ၁၀ ကြောင်း လောက် တက်လာတယ်၊ Iora ရဲ့ ကွန်မန့်၊ ဖြိုး Evergreen ရဲ့ကွန်မန့်၊ ပေါက်ရဲ့ကွန်မန့်၊ Mon Petit Avatar ရဲ့ ကွန်မန့်၊ Ko 9 ရဲ့ကွန်မန့်နဲ့ ကျနော့်နာမည်ပါတဲ့ စာကြောင်းနီတွေ ကိုတွေ့ရတယ်၊ ဘာတွေမှန်းလဲ မသိဘူး၊

ဒါနဲ့ သူတို့ရဲ့လင့်ခ်တွေကို ဆိုဒ်ဘားကနေ အရင်ဆုံး ဖြုတ်လိုက်တယ်၊ ပြန်စစ်တယ်၊ နီနေတုန်းပဲ၊ ဆက်ပြီးတော့ သူတို့ ထားခဲ့တဲ့ နောက်ဆုံးကွန်မန့်တွေကို Spam ထဲ ခဏထည့်ထားလိုက်ပြီး၊ ပြန်စစ်တယ်၊ အဲဒီတော့မှ အစိမ်းရောင် အမှန်ခြစ်ကလေး တက်လာတယ်၊ ဒါပေမယ့် ကျနော်မကျေနပ်ဘူး၊ ဒါဟာ ဘယ်လိုဖြစ်နိုင်မလဲ၊ ဒီလူတွေရဲ့ ဟိုးအရင်က ကွန်မန့်တွေက ရှိနေတုန်းပဲလေ..၊ အခုခဏလေး spam ထဲ ထည့်ထားတာက နောက်ဆုံးကွန်မန့်တွေ ချည်းပဲ၊

ကိစ္စမရှိဘူး၊ ကျနော်က ဒီအကြောင်းကို အသေးစိတ် လိုက်ချင်နေတာဆိုတော့ ဒီလိုအချိန်မျိုးကို စောင့်နေတာ...၊ အိုကေ၊ ပထမဆုံးအနေနဲ့ သေချာသွားအောင် ဆိုဒ်ဘားမှာရှိတဲ့ လင့်ခ်တွေကို တစ်ခုမကျန် အားလုံး ဖြုတ်ပစ်လိုက်တယ်၊ ပြီးတာနဲ့ ဘလော့ဂ်ကို စစ်ကြည့်တယ်၊ မဲလ်ဝဲ ဖရီး၊ ကောင်းပြီ၊ ဒုတိယအနေနဲ့ ဆိုဒ်ဘားမှာ လင့်ခ်တွေကို ၄ ခုတတွဲ ပြန်ထည့်တယ်၊ ၄ ခုထည့်ပြီးတိုင်း တခါပြန်စစ်တယ်၊ မဲလ်ဝဲဖရီး၊ ၄ ခု ထပ်ထည့်တယ်၊ ထပ်စစ်တယ်၊ မဲလ်ဝဲဖရီး၊ ဒီလိုနဲ့ အရင်အတိုင်း လင့်ခ်တွေအားလုံး ပြန်ထည့်လို့ ပြီးသွားတယ်၊ သေချာအောင် ထပ်စစ်တယ်၊ အစိမ်းရောင် အမှန်ခြစ်ပဲ...၊

နောက်အဆင့်မှာ ခုနက spam group ထဲကို ပြန်သွားပြီး တစ်ယောက်ချင်းစီရဲ့ ကွန်မန့်တွေကို Not Spam လို့ ခြစ်ပြီး ပြန်ထုတ်တယ်၊ Iora ရဲ့ ကွန်မန့် ၃ ခုကို အရင်ဆုံး ပြန်ထုတ်တယ်၊ ဘလော့ဂ်ကို ပြန်စစ်တယ်၊ မဲလ်ဝဲဖရီး...၊ ကျနော် အံ့သြသွားတယ်၊ ကိုဖြိုးရဲ့ ကွန်မန့် ၂ ခုကို ဆက်ထုတ်တယ်၊ ဘလော့ဂ်ကို ပြန်စစ်တယ်၊ မဲလ်ဝဲဖရီး...၊ ကြည့်စမ်း, ဒါ ဘယ်လိုလုပ် ဖြစ်နိုင်မလဲ၊ ကျနော် သိလိုက်ပြီ၊ ကျန်တာတွေလည်း ဒီလိုပဲ ဖရီးဆိုတာ၊ တစ်ယောက်ချင်းရဲ့ ကွန်မန့်တွေကို ထည့်ပြီးတိုင်း စစ်တယ်၊ မဲလ်ဝဲဖရီး ပြတာ အဆုံးထိပါပဲ၊ ဒါနဲ့ ကျနော့်ဘလော့ဂ်က ကွန်မန့်တွေအားလုံးလဲ ပြန်ထည့်ပြီး နောက်ဆုံးအနေနဲ့ သေချာအောင်ထပ်စစ်တယ်၊ အစိမ်းရောင် အမှန်ခြစ်နဲ့ မဲလ်ဝဲဖရီး ပါပဲ...၊

ခုနက ဒီကွန်မန့်တွေကို အနီရောင်စာသားနဲ့ မဲလ်ဝဲဆိုပြီး ပြတယ်၊ ကျနော် spam ထဲကို ပို့ထားပြီး စစ်တော့ အိုကေ၊ ဒါနဲ့ မဲလ်ဝ်ပါတယ်ဆိုတဲ့ ဒီကွန်မန့်တွေကိုပဲ ၅ မိနစ်အတွင်းမှာ ပြန်ထည့်တော့ မဲလ်ဝဲဖရီးတဲ့...၊ ဒါ ဘာသဘောလဲ၊ ဒီစစ်ဆေးတဲ့ စနစ်က reliable မဖြစ်တာ၊ သေချာမှု မရှိတာ၊ အားကိုးလို့ မရတဲ့ သဘောလား၊ အိုင်တီနဲ့ ပတ်သက်ရင် ကျနော် များများစားစား မသိပါဘူး၊ ဒါပေမယ့် ဒီလို လင်ခ့်အသေတွေ ချိတ်မိတာနဲ့ မဲလ်ဝဲဆိုတာကိုတော့ အမှန်အတိုင်း ပြောရရင် သိပ်ဘဝင် မကျပါဘူး၊ ယုတ်စွအဆုံး စစ်ဆေးတဲ့ ပရိုဂရမ်က သိပ်ပြီး sensitive ဖြစ်လို့ လင့်ခ်အသေတွေကို မဲလ်ဝဲလို့ ပြတယ်ပဲ ထားဦး၊ အခုဝဲလိုက် အခုပဲ မဝဲလိုက်နဲ့ဆိုတော့....၊ ဟုတ်ပါ့မလား မောင်ကာလုရေ လို့များ ဆိုရလေမလား...၊

အခု ဖြစ်စဉ်ကိုတော့ ကျနော်နားမလည်တာ အမှန်ပါပဲ၊ တစ်ယောက်ယောက်ကများ ရှင်းပြပေးနိုင်တယ် ဆိုရင်လည်း အတိုင်းထက်အလွန် သိချင်ပါတယ်၊ ဘယ်လိုပဲဖြစ်ဖြစ် ဒီကိစ္စနဲ့ ပတ်သက်ပြီး ဘလော့ဂါ ညီအကို မောင်နှမတွေ အစိုးရိမ်လွန်နေမှာ စိုးလို့ ကျနော်တွေ့မိတာ တင်ပြလိုက်တာပါ၊ အကောင်းဆုံးကတော့ တတ်နိုင်သလောက် back-up လုပ်ထားတာပါပဲ၊ ပျော်ရွှင်စွာ ဘလော့ဂင်း နိုင်ကြပါစေဗျာ...။ ။


ညီလင်းသစ်
၁၄ ဖေဖော်ဝါရီ၊ ၂၀၁၁

စကားချပ်။ ။ ဒီနေ့မှာ နှင်းဆီပန်းအကြောင်းလေး ဘာလေး ရေးရမယ့်အစား ဒါကြီးအကြောင်း ရေးနေရတယ်လို့၊ ဖြစ်ပုံများ၊ အင်း...မဲလ်ဝဲတစ်စည်းလောက် လက်ဆောင်ပေးရရင် ကောင်းမယ်နဲ့ တူတယ်...။း)

12 February 2011

မတည်မြဲခြင်းတရားထဲမှ ဘလော့ဂိုစဖီးယား


ဒီရက်ပိုင်းမှာ malware နဲ့ဆက်နွယ်ပြီး ဘလော့ဂ်နဲ့ ဘလော့ဂိုစဖီးယား အကြောင်း နဲနဲတွေးဖြစ်ပါတယ်၊ ဒီကိစ္စကို အားတက်သရော အကူအညီပေးကြသူတွေရဲ့ အဆိုအရနဲ့ ကျနော်နားလည်မိသလောက်ကတော့ ဒီမဲလ်ဝဲဆိုတာ လင့်ခ်အသေတွေ များနေတဲ့ ပြဿနာပါပဲ၊ ဆက်ပြီး မရေးတော့တဲ့ ဘလော့ဂ်တွေ၊ ဝက်ဘ်ဆိုဒ်တွေကို စစ်တဲ့စက်က မဲလ်ဝဲဆိုပြီး ပြတော့ လူတွေလည်း လန့်ကုန်ရော...၊ အခုခေတ်မှာက trojan, malware, adware, spam ဆိုတာတွေက ကိုယ့်ကွန်ပြူတာကို ကောင်းကောင်းဒုက္ခ ပေးနိုင်တာကိုး၊ ဒါနဲ့ပဲ စစ်ကြ၊ ဆေးကြ လုပ်ကြရတော့တယ်...၊

ဒါပေမယ့် ကျနော်တွေးနေမိတာ ၂ ချက်ရှိပါတယ်၊ ပထမအချက်က ဂူးဂဲလ်ရဲ့ စပန်းမ်တွေ၊ ဝက်ဘ်ဆိုဒ်အသေတွေ စစ်တဲ့စက်က ဒီလို လင့်ခ်အသေတွေ ချိတ်ထားမိရုံနဲ့ ကိုယ့်ဘလော့ဂ်ကို တကယ်ပဲ ပိတ်ပစ်တာလား ဆိုတာပါ၊ ဒီလိုဆိုရင် သူတို့ပိတ်ရမယ့် ဘလော့ဂ်တွေ၊ ဆိုဒ်တွေက အများကြီး ဖြစ်နေလိမ့်မယ်၊ အခုခေတ်မှာ အားလုံးလိုလိုက ဒီလို အပြန်အလှန် လင့်ခ်တွေ ချိတ်ထားကြတာကိုး၊ ဒီလို ချိတ်ထားတဲ့ လင့်ခ်တွေထဲမှာ သေနေတဲ့လင့်ခ်က အမြဲလိုလို ပါနေမှာပဲ၊ ဒါကတစ်ချက်...၊

ဒုတိယတချက်က ကျနော်တို့ အဲဒီ Sucuri ဆိုဒ်မှာ သွားစစ်လိုက်တယ်၊ ဆိုဒ်ဘား လင့်ခ်တွေနဲ့ ကွန်မန့်တွေကို ဖြုတ်လိုက်တယ်၊ အစိမ်းရောင် အမှန်ခြစ်ကလေး တက်လာတယ်၊ အားလုံး အိုကေ၊ မဲလ်ဝဲ မရှိတော့ဘူး၊ ဒါပေမယ့် ဒါက အဲဒီဆိုဒ်ရဲ့ စစ်ဆေးချက်...၊ လက်တွေ့မှာ ဂူးဂဲလ် ရဲ့မဲလ်ဝဲစစ်စက်နဲ့ အဲဒီစက်တို့ တကယ်ပဲ တူရဲ့လား၊ ဂူးဂဲလ်ရဲ့ မဲလ်ဝဲ test procedure နဲ့ အဲဒီအဖွဲ့ရဲ့ ပရိုစီဂျာက အတူတူပဲလား၊ မတူဘူးဆိုရင် သူတို့က clean ဆိုပေမယ့် ဂူးဂဲလ်က တစ်ခုခု တွေ့ချင် တွေ့နေဦးမှာလား...၊ အဲဒီဆိုဒ်မှာတော့ သူတို့နဲ့ ဂူးဂဲလ်၊ ဘလော့ဂါ အတူတူပဲဆိုတာ မတွေ့မိပါဘူး၊ ကျနော် မျက်စိ ရှမ်းတာလည်း ဖြစ်နိုင်ပါတယ်၊

ဒါတွေနဲ့ ဆက်စပ်ပြီး ဘလော့စပေါ့ရဲ့ help center တွေ၊ ဖိုရမ်တွေထဲ နဲနဲ မွှေနှောက် ကြည့်မိတယ်၊ တနေ့တနေ့ ဘလော့ဂ် အပိတ်ခံရလို့ တက်လာတဲ့ ကွန်ပလိန်းတွေ မနည်းဘူး၊ ငါ ဘလော့ဂ်ရေးလာတာ ၁၀ နှစ် မက,တော့ဘူး၊ ငါ့ကို ဘာဖြစ်လို့ ပိတ်တာလဲ-တို့၊ မနေ့ကပဲ ဘလော့စပေါ့မှာ ပထမဦးဆုံး ဘလော့ဂ်စ,ဖွင့်ပြီး ပို့စ် ၂ ခု တင်တယ်၊ ဒီနေ့မနက် ငါ့ဘလော့ဂ်ကို ပိတ်ပစ်လိုက်တယ်-တို့၊ ငါ့ဘလော့ဂ်မှာ ဘာကြော်ငြာမှ မတင်ဘူး၊ ဒါပေမယ့် မင်းတို့ရဲ့ spam robot က ဘာဖြစ်လို့ ပိတ်ရတာလဲ-တို့... တကယ့်ကို အစုံပါပဲ၊ ဒီကြားထဲ တစ်ယောက်က ရီရသေးတယ်၊ ငါက ဖေဖော်ဝါရီ ၂၉ မှာ မွေးတာကွ၊ အဲဒါ ပရိုဖိုင်းလ်မှာ ထည့်ဖို့လုပ်တော့ မင်းတို့ရဲ့ ဘလော့ဂါ ပလက်ဖောင်းက ဒီရက်မရှိဘူးဆိုပြီး လုပ်တယ်၊ ဘာသဘောလဲကွ-တဲ့၊ တော်တော် ဒေါပွနေပုံပဲ...၊ ကျနော် ပြောချင်တာက နောက်ခံ အကြောင်းတွေက အမျိုးမျိုးတွေ ရှိပေမယ့် အပိတ်ခံရတာ၊ အဟက်ခ်ခံရတာမှာတော့ သိပ်မကွာဘူး ဆိုတာပါ၊

ဒါတွေက ကိုယ့်ရဲ့ သဘောမပါဘဲ ရပ်လိုက်ရတဲ့ ဘလော့ဂ်တွေ...၊ တခြားဖက်မှာလည်း အရေးအသားကောင်း၊ ဧည့်သည် လည်းများပေမယ့် ရပ်လိုက်ကြတဲ့ ဘလော့ဂ်ကောင်းတွေလည်း အများကြီးပါပဲ၊ ကျနော်ဘလော့ဂ် ရေးနေတဲ့ ဒီ ၄ နှစ်အတွင်းမှာ ဒီလိုမျိုးတွေ တွေ့ခဲ့ရတယ်၊ အင်မတန်ကောင်းတဲ့ ဘလော့ဂ် ဖြစ်ပေမယ့် အမျိုးမျိုး တိုက်ခိုက်ခံရလို့ စိတ်ညစ်ပြီး ရပ်လိုက်တာ၊ ကိုယ်ရေးကိုယ်တာ အကြောင်းနဲ့ ရပ်လိုက်တာ၊ ဘလော့စပေါ့ကို ပိတ်ထားတဲ့ နိုင်ငံကို ရောက်သွားလို့ မရပ်ချင့်၊ ရပ်ချင်နဲ့ ရပ်လိုက်ရတာ၊ စာဆက်ရေးနေပေမယ့် စိတ်ကုန်သွားလို့ ပတ်ဘလစ်ရှ် မလုပ်တော့တာ... တကယ့်ကို အများကြီးပါ၊ ဝမ်းသာစရာ အကြောင်းတွေလည်း ရှိပါသေးတယ်၊ တချို့က အဝေးမှာ ရောက်နေတာတောင် မိဘက ခွင့်မပြုလို့ မနည်းကို အပေးအယူလုပ်၊ အတိုက်အခံလုပ်ပြီး ရေးရတယ်၊ တချို့ကလည်း ဟိုး အရင်ကတည်းက ရေးခဲ့ပြီး အမှတ်မရှိလို့ တတိယအကြိမ်တောင် ပြန်ရေးနေပြန်ရေား) ...၊

ဆိုတော့ အထက်မှာ သုံးသပ်၊ တွေးဆမိသလို ဒီမဲလ်ဝဲနဲ့ ပတ်သက်ပြီး ပထမတော့ ကျနော်ဘာမှ မလုပ်ဘဲ ထားမလို့ပါ၊ ကျနော်ရဲ့ ပို့စ်တွေ တော်တော်များများနဲ့ ဓါတ်ပုံတွေအားလုံးက back-up ရှိပါတယ်၊ ဒါပေမယ့် ဘလော့ဂိုစဖီးယားထဲက ဘလော့ဂ်လေးတစ်ခုအနေနဲ့ အသိုင်းအဝိုင်းမှာ ကိုယ့်ကြောင့် သူများတွေပါ အနှောင့်အယှက်ဖြစ်မှာ စိုးတာနဲ့ ဘယ်လိုပဲ ဖြစ်ဖြစ် လိုအပ်တာတွေ လုပ်လိုက်ပါတော့တယ်၊ နောက်တစ်ခုက ၄ နှစ်ထဲ ရောက်လာတော့ ဒီဘလော့ဂ်လေးကို ကျနော် နဲနဲ သံယောဇဉ် ဖြစ်လာတာလည်း ပါတယ်၊ ဟုတ်တယ်၊ သူ့မျက်နှာစာမှာ အတိုက်ခိုက်ခံရသည် လို့ စာတန်းနီကြီး မမြင်ချင်ပါဘူး၊ ကျနော့်မှာ facebook အကောင့်တစ်ခု ရှိပေမယ့် မသုံးဘဲ ပစ်ထားတာ ကြာနေပြီ၊ ဖွင့်ထားတာလည်း ကြာပါပြီ၊ မကြာခဏ ဆိုသလိုလည်း အားစိုက်ပြီး အပ်ပ်တူဒိတ် ဖြစ်အောင်လုပ်ဖို့ စဉ်းစားတယ်၊ ဒါပေမယ့် ကျနော် ဘယ်လိုမှ မ'ငြိ'ဘူး၊ တွစ်တာတို့ ဖလစ်ကာတို့ဆိုလည်း အတူတူပဲ၊ ဖလစ်ကာဆို ဓါတ်ပုံအသိုင်းအဝိုင်းမို့ စိတ်ဝင်စားစရာ တွေ၊ ပညာယူစရာတွေ အများကြီး ရှိပေမယ့် လောလောဆယ်တော့ မရောက်ဖြစ်သေးပါဘူး၊ နောက်ဆုံးတော့ ဒီဘလော့ဂ် မှာပဲ မြဲနေခဲ့တယ်၊ ဒါပေမယ့် မတည်မြဲခြင်းထဲက ဘလော့ဂိုစဖီးယားမို့ သူက (မှားပြီး) ပိတ်လိုက်တဲ့နေ့၊ ဒါမှမဟုတ် ကိုယ့်ဟာကိုယ် ရပ်ချင်တဲ့နေ့ အထိပေါ့ ။ ။


ညီလင်းသစ်
၁၂ ဖေဖော်ဝါရီ၊ ၂၀၁၁

10 February 2011

ဆောင်းရဲ့ညချမ်း၊ အလွမ်းမှတ်တိုင် နှစ်ချို့ဝိုင်


မနှစ်က ဒီဇင်ဘာလ ၂၇ ရက်နေ့ညမှာ ရိုက်ဖြစ်တဲ့ ပုံလေးပါ၊ ကျနော်တို့ အားလပ်ရက် တစ်ပတ်တာ ခရီးထွက်နေတဲ့ ကာလမှာပါပဲ၊ အဲဒီညမှာတော့ မအိမ်သူနဲ့သားက ဧည့်ခန်းက ထိုင်ခုံမှာပဲ အိပ်ပျော်နေကြတယ်၊ တကယ်တော့ ညနေ ၆ နာရီ ကျော်ကျော်လေးပဲ ရှိသေးတာ...၊ ညစာတောင် မစားရသေးဘူး၊ စာဖတ်နေကြရင်းနဲ့ကို အိပ်ငိုက်ပြီး အိပ်ပျော်သွား ကြတာ၊ အအိပ်အနေ နည်းတဲ့ ကျနော့်မှာသာ ယောင်တောင်တောင်နဲ့ ထိုင်နေမိတယ်၊ ဒါနဲ့ ဒီပုံလေးကို ရိုက်ဖြစ်ပါတယ်၊ အဲဒီအချိန်မှာ တခုခုကိုလည်း လွမ်းနေမိသလိုပဲ...၊


ဆောင်းရဲ့ညချမ်း
Photobucket
5DmarkII + 24-105mm EF f/4 L, 75mm, f/5.6, 1/60, iso200

Strobist: 1 Yongnuo YN-560 camera right, power 1/32 bare, 1 Canon speedlite 430Ex camera left as fill, power 1/64 Gary Fong light sphere, flash triggered by Yongnuo RF-602 remote trigger.


ဒီပုံကို ရိုက်တော့ ဘက်ဂရောင်းက မီးလင်းဖိုက အရမ်းလင်းပါတယ်၊ အဲဒီမီးကို ယူပြီးရိုက်ရင် main subject ဖြစ်တဲ့ ဝိုင်ပုလင်းနဲ့ခွက်က မှောင်သွားမယ်၊ တခါ ဝိုင်ပုလင်းကို အဓိကယူရင် သူ့အပေါ်မှာ အလင်းနည်းတဲ့အတွက် ကင်မရာက အဲဒီပုလင်းအတွက် အလင်းကို မြှင့်ပေးပါလိမ့်မယ်၊ အဲဒီလိုဆိုရင် နောက်ဖက်က မီးလင်းဖိုက နဂိုကထက် ကို ပိုပြီး လင်းလာလိမ့်မယ်၊ main subject ကိုကျော်ပြီး ကြည့်သူရဲ့ အာရုံကို အရင်ဆုံး ဖမ်းယူပါလိမ့်မယ်၊ ကျနော်က မီးလင်းဖိုရဲ့ ဘက်ဂရောင်း အငွေ့အသက်လည်း ပါချင်၊ သူ့ဆီက အနှောင့်အယှက်ကိုလည်း မလိုချင်တဲ့အတွက် အမှောင်ခပ်များများနဲ့ setting လုပ်ပြီးမှ လိုအပ်တဲ့အလင်းကို flash ကနေ ပြန်ယူပါတယ်၊    Off-camera flash ဒါမှမဟုတ် strobist နည်းပါပဲ၊ Setting နဲ့ data အသေးစိတ်ကိုတော့ ပုံရဲ့အောက်ဖက်မှာ ပေးထားပါတယ်၊ အောက်က ပုံကတော့ ပထမဆုံး test shot ရိုက်တုန်းက ပုံပါ၊ ဘာ flash မှ မပါ,ပါဘူး၊


Photobucket

မီးလင်းဖိုက subject ကို ကျော်လွန်ပြီးတော့တောင် တောက်ပနေသလို သူ့အလင်းကြောင့်လည်း နောက်ဖက်က နံရံတို့၊ heater ခလုတ်တို့ပါ မလိုအပ်ဘဲ ပေါ်လွင်လွန်းနေတာ သတိထားမိပါလိမ့်မယ်၊ နောက်တစ်ခု ပြောစရာ ရှိတာက ဝိုင်ခွက်ပါ၊ ခြေထောက်တိုတိုနဲ့ သိပ်မလှဘူး၊ ဒါကတော့ ဘာမှမတတ်နိုင်ပါဘူး၊ သူများ အိမ်မှာ ရိုက်ရတာဆိုတော့ ရှိတာနဲ့ပဲ၊ လိုက်ရှာကြည့်တော့လည်း မီးဖိုချောင်တခုလုံးမှာ အဲဒီလိုခွက် တမျိုးပဲ တွေ့ရတယ်၊ အခုနောက်ပိုင်းမှာ ဒီ နည်းစနစ်နဲ့ ပုံတွေ အမျိုးမျိုး ရိုက်ကြည့်ချင်နေ မိတယ်၊ တကယ်တော့ ကင်မရာ ခလုတ်ကို နှိပ်တာထက် အလင်းကို 'မြင်' အောင် ကြည့်နိုင်ဖို့က ပိုပြီးခက်ပါတယ်၊ ဓါတ်ပုံဆိုတာက အလင်းနဲ့ရေးတဲ့ ပန်းချီပဲ မဟုတ်လား....။ ။

(Strobist အကြောင်း ပိုသိချင်ရင် ဒီမှာ သွားဖတ်လို့ ရပါတယ်။)


ညီလင်းသစ်
၁၀ ဖေဖော်ဝါရီ၊ ၂၀၁၁

07 February 2011

လူရိုင်းတို့ရဲ့ ဧည့်သည်


ကျနော်သွားခဲ့ဖူးတဲ့ ခရီးတွေအကြောင်း တခါတခါ ပြန်တွေးမိရင် ဒီအကြောင်းလေးက ရံဖန်ရံခါ ခေါင်းထဲ ရောက်,ရောက်လာတတ်ပါတယ်၊ တချို့နေရာတွေက ဘဝမှာ အကြိမ်ပေါင်းများစွာ ပြန်သွားလို့ ရပေမယ့် တချို့နေရာတွေ အတွက်တော့ မဖြစ်နိုင်ပါဘူး၊ ကျနော်ပြောပြမယ့် အဲဒီခရီးက နောက်တစ်ကြိမ်ပြန်သွားဖို့ မဖြစ်နိုင်တဲ့ ခရီးပါပဲ၊ ဒီခရီးကို သွားခဲ့မိလို့ ပြန်တွေးတိုင်း ကျေနပ်ရပေမယ့် တခါတခါတော့လည်း ငါ,အဲဒီကို တကယ်ပဲ သွားခဲ့တာမှ ဟုတ်ရဲ့လား-လို့ ကိုယ့်ဟာကိုယ် ဇဝေဇဝါနဲ့...၊ လွန်ခဲ့တဲ့ ၁၂ နှစ်၊ ၁၃ နှစ် လောက်က ဆိုပေမယ့် အဝေးကြီး နောက်မှာ ကျန်နေခဲ့သလိုပဲ၊ ခရီးရဲ့ မှတ်တမ်းမှတ်ရာတွေ၊ ဓါတ်ပုံတွေ လည်း ဘယ်မှာ ပြန်ရှာရမလဲ မသိတော့ဘူး၊ ကျနော် အလည်သွားခဲ့တဲ့ နေရာက လူအချို့ နေခဲ့ဖူးတဲ့ အိမ် တစ်အိမ်ပါ၊ တကယ်တော့ အိမ်တစ်အိမ်ဆိုတာထက် ဂူတစ်လုံးဆိုရင် ပိုမှန်ပါလိမ့်မယ်၊ ပိုပြီး တိတိကျကျ ပြောရရင် ကျောက်ခေတ်နှောင်းပိုင်းက ကျောက်ခေတ်လူသားတွေ နေခဲ့တဲ့ ပြဒါးလင်း ဂူကိုပါပဲ...၊


၁၉၉၇-၉၈ တဝိုက်လောက်က ကလောမြို့ကို ကျနော်မကြာခဏ ရောက်နေဖြစ်တယ်၊ အဲဒီမှာနေတဲ့ ထွန်းထွန်းဆိုတဲ့ သူငယ်ချင်းတစ်ယောက်နဲ့ လောလောလတ်လတ် အသိအကျွမ်းဖြစ်ပြီးကာစ၊ လူကလည်း အလုပ်မရှိ အားနေတဲ့အချိန်၊ ရာသီဥတုကလည်း ကျနော်ကြိုက်တဲ့ ခပ်အေးအေးဒေသ ဆိုတော့ ဘာပြော ကောင်းမလဲ၊ ရန်ကုန်နဲ့ ကလောက အိမ်ဦးနဲ့ ကြမ်းပြင်ပဲ၊ ထွန်းထွန်းကလည်း Trekking ဝါသနာပါတော့ ကျနော်တို့ ကလောတဝိုက်က ပလောင်ရွာများစွာကို သွားလည်ဖြစ်တယ်၊ ပြီးတော့ ပင်းတယ သွားလိုက်၊ အင်းထဲဆင်းလိုက်၊ တောင်ကြီးတက်လိုက်၊ ကလောမှာ ပြန်အိပ်လိုက်၊ ပလောင်တွေဆီ သွားလိုက်နဲ့...၊ ကလောတစ်ခေါက်သွားရင် ကျနော့်မှာ ရန်ကုန်ကို တော်တော်နဲ့ကို မပြန်နိုင်ဘူး၊ ဒီလိုနဲ့ တစ်နေ့မှာ ဂူတွေ အကြောင်းပြောကြရင်း ပြဒါးလင်း (ပဒလင်း၊ ပဒတ်လှိုင် လို့လည်းခေါ်ပါတယ်) အကြောင်းက ပါလာတယ်၊ ကျနော်တို့က မနုဿကျော်ဝင်း၊ ဒေါက်တာခင်မောင်ညွန့် တို့ရဲ့လက်ချာတွေ၊ ဦးအောင်သော်ရဲ့ ပြဒါးလင်း တူးဖော်မှုစာတမ်း၊ ဆရာကြီး ဒေါက်တာသန်းထွန်းရဲ့ စာစုတွေ နဲ့ ဒီဂူကို ရင်းနှီးနေခဲ့တယ်၊ ရောက်နေတာက လည်း ကလောမှာဆိုတော့ ရွာငံနားမှာရှိတဲ့ ပြဒါးလင်းနဲ့လည်း သိပ်မဝေးဘူး၊ ဒီလိုနဲ့ သိပ်ရှည်ရှည်ဝေးဝေး မစဉ်းစားဘဲ သွားမယ်လို့ ဆုံးဖြတ်လိုက်ကြတယ်၊ သွားမှာက လေးယောက်...၊ ကျနော်ရယ်၊ ထွန်းထွန်းရယ်၊ ကလောမှာပဲ နေတဲ့ ကိုစံခါး (သူ့နာမည် အမှန်က ရှန်ကာ၊ ဂေါ်ရခါးကပြား)၊ ပြီးတော့ ရန်ကုန်က ကျနော်နဲ့ ပါလာတဲ့ ကိုပေါက်၊ ကိုပေါက်က တိုက်ကြီးဇာတိ၊ သူက ပြဒါးလင်းမှ မဟုတ်ပါဘူး၊ အမဲလိုက်တာ ဝါသနာပါ လို့ တောထဲတောင်ထဲ သွားနေရရင် ပျော်နေတဲ့လူ...၊ သွားမယ်သာ ပြောတာ၊ ကျနော်တို့မှာ ဘာမှမပြည့်စုံ ဘူး၊ ကျနော်တို့က ရှေးဟောင်းကလည်း မဟုတ်၊ ဘူမိကလည်း မဟုတ်၊ သစ်တောကလည်း မဟုတ်၊ စိတ်ဝင်စားလွန်းလို့သာ သွားကြမှာ၊ ဆေးဝါးမရှိ၊ လမ်းလျှောက်ဖိနပ် မရှိ၊ မိုးကာမရှိ၊ သံလိုက်အိမ်မြှောင် မရှိ၊ တောတက်မယ့် လူတစ်ယောက် ရှိသင့်တဲ့ဟာ တခုမှ မရှိဘူး၊ ဒါတွေဝယ်ဖို့ ပိုက်ဆံလည်း မရှိဘူး၊ ဒီတော့ ထွန်းထွန်းကပဲ ဟိုလိုက်ငှား၊ ဒီလိုက်ငှား လုပ်ရတော့တယ်၊


အထိုက်အလျောက် အဆင်သင့်ဖြစ်တော့ အောင်ပန်းဈေးနေ့ကို စောင့်တယ်၊ သွားရမှာက အောင်ပန်း-ရွာငံ ဈေးကားကိုစီး၊ ရွာငံမှာ တညအိပ်၊ နောက်တစ်နေ့မှာ ပြဒါးလင်းကို ခြေကျင်လျှောက်...၊ ဒီလိုနဲ့ ဈေးနေ့ ရောက်လာတော့ ကလောကနေ အောင်ပန်းကို သွားလိုက်တယ်၊ ဟိုမှာ စောနေသေးတော့ ဈေးလက်ဖက် ရည်ဆိုင်မှာ ထိုင်နေရသေးတယ်၊ ဆိုင်ရှေ့က ဖြတ်လျှောက်သွားကြတဲ့ ပအိုဝ့်တွေ၊ ပလောင်တွေကို ငေး ကြည့်ရင်း လူရိုင်းတို့ရဲ့ အငွေ့အသက်တွေ ရှိရာဆီ သွားမယ့်ခရီးအတွက် ကျနော် စိတ်လှုပ်ရှားနေခဲ့တယ်၊ ရှေ့မှာ ဘာမှ ကြိုမမြင်နိုင်ဘူး မဟုတ်လား...၊


ဈေးကွဲချိန်မှာ ရွာငံပြန်တဲ့ ဒိုင်နာကားကို စီးရတယ်၊ တစ်စီးတည်းသောကား..၊ ခေါင်မိုးပေါ်က ယောင်္ကျား တွေနေရာ၊ ကားထဲမှာက ခြင်းတောင်းကြီးတွေ နဲ့အတူ မိန်းမတွေ ထိုင်ကြတယ်၊ ရွာငံသွားတဲ့လမ်းက အောင်ပန်း ပင်းတယလမ်းကနေ တဝက်လောက်မှာ ဘယ်ဖက်ကို ခွဲထွက်သွားတာပါ၊ ဒိုင်နာကား ခေါင်မိုး ပေါ်က ဝက်ခြံထဲ မှာ ခြေတွဲလောင်းချထိုင်ရင်း အောင်ပန်းကနေ ရွာငံသွားခဲ့တဲ့ လမ်းမြင်ကွင်းကို ဘာနဲ့မှ မလဲနိုင် ပါဘူး၊ လမ်း တဖက်တချက်က စိုက်ခင်းတွေက အရမ်းလှတယ်၊ ပို့စကဒ်တွေထဲက ရှုခင်းမျိုးတွေနဲ့ ဆင်တယ်၊ တောင်ကုန်း ပြေပြေလေးတွေပေါ်မှာ စိုက်ခင်းအစိမ်း တထပ်၊ မြေနီတထပ်နဲ့၊ တခါတရံ ကုန်းထိပ်မှာ သစ်ပင် တစ်ပင်တလေ ရှိတတ်တယ်၊ ဒါမှမဟုတ် တရုတ်ပြည်လုပ် ရောင်စုံ မျက်နှာသုတ်ပုဝါ ခေါင်းပေါင်း၊ ဝတ်စုံအမည်းတွေနဲ့ ရိုးတံရှည် ပေါက်တူးကိုင် ပအို့ဝ် တောင်သူတွေ လည်းရှိတတ်တယ်၊ လေက လတ်ဆတ်တယ်၊ အဲဒီမြင်ကွင်းလေးကို ပြန်မြင်ယောင်တိုင်း ရင်ဘတ်ထဲမှာ နူးညံ့တဲ့ နာကျင် လွမ်းဆွတ်မှုလေးတခု ဖြတ်သန်း၊ တွန်းတိုက်သွားလေ့ ရှိပါတယ်...၊


ရွာငံရောက်တော့ တခုတည်းသော တည်းခိုခန်းမှာ တည်းကြတယ်၊ နာမည်တော့ မေ့နေပြီ၊ ဒါမှမဟုတ် နာမည် မရှိတာလည်း ဖြစ်နိုင်ပါတယ်၊ ကျေးလက်တို့ရဲ့ ထုံးစံအတိုင်း ရွာမှာဧည့်သည် ရောက်တာနဲ့ နာရီပိုင်း အတွင်း တရွာလုံး သိနှင့်ပြီးပြီ၊ ဘယ်သူတွေလဲ၊ ဘာလာ လုပ်ကြတာလဲ၊ ဒါဟာ ဒီနေရာမှာတော့ ကျနော်တို့ အတွက် ကောင်းသွားတယ်၊ ဘာဖြစ်လို့လဲဆိုတော့ ညနေစောင်းလောက်မှာ ရွာလူကြီးဆိုတဲ့ လူတစ်ယောက် ကျနော်တို့ကို လာတွေ့တယ်၊ ကျနော်တို့ ပြဒါးလင်း သွားမယ့်ခရီးမှာ သူလမ်းပြ လုပ်ပေးနိုင် တယ်ဆိုတာ လာပြောတာပါ၊ လမ်းပြခ,က မှတ်မှတ်ရရ ကျပ် ၂၀၀၀...၊ ဒါနဲ့ စကားစမြည် ပြောကြရင်း ခရီး စဉ်ကို ရေးဆွဲကြတယ်၊ နေ့တဝက်လောက် လျှောက်ရမှာ ဖြစ်ကြောင်း၊ လူသွားလမ်း ရှိလို့ တောထွင်ပြီး သွားစရာ မလိုကြောင်း၊ ဂူမှာ ညအိပ်ရမှာ ဖြစ်ကြောင်းနဲ့ လမ်းမှာစားမယ့် နေ့လယ်စာ၊ ဟိုမှာစားမယ့် ညစာ၊ နောက်တစ်နေ့ လမ်းမှာစားမယ့် နေ့လယ်စာတို့ကို သူကပဲ စီစဉ်ပေးမယ့် အကြောင်း၊ ဒါတွေဝယ်ဖို့ လိုအပ် တဲ့ ငွေကြေး အနည်းငယ်သာ သူ့ကို ပေးထားစေလိုကြောင်း အဲဒီလူက ပြောတယ်၊ အိုကေ ပေးမယ်..၊ ဒါနဲ့ ကျနော်တို့က 'ဒါဆို ကျနော်တို့ဖက်ကကော ဘာပြင်ဆင်ရမလဲ' ဆိုတော့ 'အရက်သာဝယ်'တဲ့၊ တောထဲဆို တော့ ဒါဟာ ဆေးဖြစ်ဝါးဖြစ်ပါတဲ့၊ ဒါနဲ့ အဲဒီမှာ သောက်ကြတဲ့ ဒေသထွက် 'ရွှေသမင်' ဆိုတဲ့ အရက်တစ်လုံး ဝယ်လိုက်တယ်၊ ဒါဟာ ပြဒါးလင်းခရီးအတွက် ကျနော်တို့ရဲ့ နောက်ဆုံး ပြင်ဆင်မှုပါပဲ၊ အို..ဂူအောင်းလူသား တို့.., အသင်တို့၏ နေရပ်သို့လာရန် ကျွန်ုပ်တို့ကား အဆင်သင့် ဖြစ်ခဲ့ပြီ...၊


နောက်တစ်နေ့ မနက် ၆ နာရီမှာ ကျနော်တို့ စ,ထွက်တယ်၊ အောင်ပန်းက ဝယ်လာတဲ့ မုန့်ကြွပ်ကို ရေနဲ့ မျှောချပြီး မနက်စာ,စားလိုက်တယ်၊ ညအိပ်ခရီး ဆိုပေမယ့် ကျနော်တို့အားလုံး အင်္ကျီအပိုတထည်စီ နဲ့ ပေါ့ပေါ့ပါးပါး ပါပဲ၊ ကိုပေါက်ကတော့ မုဆိုးပီပီ လက်နက်တစ်ခုခု မပါရင် တောမတက်တတ်လို့ သူ့ကို ဓါးမြှောင်တစ်ချောင်း ပေးထားလိုက်တယ်၊ လမ်းခရီးက အဆင်ပြေ ချောမွေ့ပါတယ်၊ လမ်းမှာ ဝါးရုံတောတွေ အများကြီး ဖြတ်ခဲ့ရတာ မှတ်မိတယ်၊ ဒါပေမယ့် လူသွားလမ်းက ရှိပြီးသားဆိုတော့ အေးအေးလူလူ လျှောက် လို့ရတယ်၊ ပြီးတော့ တောင်ခါးပန်းတွေကို ပတ်ပြီး မြေပြန့်ဖက်ကို ဆင်းတာဖြစ်လို့ မပင်ပန်းပါဘူး၊ အကောင် ပလောင်ဆိုလို့ တထွာလောက် ရှည်တဲ့ ကင်းခြေများ တစ်ကောင်နဲ့ မြက်လျှောလိုလို မြွေတစ်ကောင်ပဲ တွေ့တယ်၊ လမ်းမှာ ကျနော်တို့ရဲ့ လမ်းပြကြီးယူလာတဲ့ ကောက်ညှင်းထုပ်တွေကို နေ့လယ်စာအဖြစ် စားကြ တယ်၊ မြန်မြန်စားပြီး များများဆက်လျှောက် ရပြန်တယ်၊


ဒီလိုနဲ့ နေ့လယ် ၂ နာရီထိုးဖို့ ၁၀ မိနစ်အလိုမှာ ကျနော်တို့ ပြဒါးလင်းဂူကို ရောက်ပါတယ်၊ ဂူ ၁ နဲ့ ဂူ ၂ ဆိုပြီး နှစ်ခုရှိရာမှာ ဂူ ၁ ကို အရင်ရောက်တယ်၊ ရောက်ခါနီး နာရီဝက် အလိုလောက်မှာ လမ်းပြကြီးက ရောက်တော့မယ်လို့ ဆိုကတည်းက ကျနော် ရင်တွေခုန်နေခဲ့ပြီ၊ စပြီး တွေ့ရတာက သစ်ပင်တွေ၊ ခြုံနွယ်တွေ အောက်က ထိုးထွက်နေတဲ့ ဂူရဲ့အမိုးစွန်း...၊ ကျနော်တို့အားလုံး မပြေးရုံတမယ် ခြေလှမ်းတွေ ခပ်သွက်သွက် လှမ်းလိုက်ကြတယ်၊ ဂူက နဲနဲ အမြင့်မှာရှိလို့ နီးလာပေမယ့် ဂူထဲကို မမြင်ရသေးဘူး၊ အဲဒီမှာ ဘွားကနဲ တွေ့လိုက်ရတာက အုတ်တံတိုင်းကြီး...၊ ဟုတ်တယ်၊ ရှေးဟောင်းသုတေသနက ခတ်ထားခဲ့တဲ့ အုတ်တံတိုင်းကြီး၊ ဝင်ဖို့ သံပန်းတံခါး တစ်ခုရှိပေမယ့် သော့ခတ်ထားတယ်၊ သော့ကို တောင်ကြီးမြို့ ရှေးဟောင်းက ထိန်းသိမ်းထားတယ်လို့ လမ်းပြကြီးက ပြောတယ်၊ ပထမတော့ ကျနော်တို့ စိတ်ညစ်သွား တယ်၊ ဂူထဲကို ဘယ်လို ဝင်ကြမလဲ၊ ဒီအထိ ရောက်လာပြီးမှ လှည့်ပြန်ဖို့ကတော့ လုံးဝ စိတ်မကူးဘူး၊ တောင်ကြီးမှာ အစောကြီးထဲက သော့သွားတောင်းရင်လည်း ရမှာ မဟုတ်ပါဘူး၊ ကျနော်တို့က အဖွဲ့အစည်း ကမှ မဟုတ်တာ...၊ ဒါပေမယ့် အရမ်းကို စိတ်ဝင်စားလွန်းလို့သာ ရောက်အောင် လာခဲ့တာ၊ ရောက်မယ်၊ မြင်မယ်၊ ခံစားမယ်၊ ရည်ရွယ်ချက်က ဒါပဲ၊ ဖျက်လိုဖျက်ဆီး လုပ်ကြမယ့် သူတွေမှ မဟုတ်တာ..၊ ဒီလိုတွေး ပြီး ကျနော်တို့ အားလုံး လိပ်ပြာသန့်စွာနဲ့ အုတ်တံတိုင်းကို ကျော်ဝင်ခဲ့ကြတယ်၊


ဂူက မနက်ပါဘူး၊ မိုးဗြဲဒယ်ကို ဒေါင်လိုက်ထောင်ထားသလို ခပ်ပက်ပက် ပုံစံ...၊ ပေ ၃၀-၄၀ လောက်ပဲ နက် မယ်၊ ဒါပေမယ့် ဒီဂူထဲမှာပဲ လွန်ခဲ့တဲ့ နှစ်ပေါင်း ၁၀,၀၀၀ နဲ့ ၁၂,၀၀၀ ကြားမှာ ကျောက်ခေတ်လူသားတွေ တကယ်ကို နေထိုင် သွားခဲ့ကြတယ်၊ ရှေးဟောင်းက ဒီဂူထဲမှာ ကျောက်လက်နက်တွေ အများကြီး တွေ့ခဲ့ တယ်၊ ကျောက်ဓါး၊ ကျောက်ပုဆိန်လို အသွားချွန် ကိရိယာတွေ၊ ကျောက်တင်းပုတ်လို ဟာတွေအပြင် တိရိစ္ဆာန်အရိုးနဲ့ လူအရိုးတွေပါ တွေ့ခဲ့တယ်၊ သုတေသနပြုချက်တွေ အရတော့ ကျောက်ခေတ်နှောင်းပိုင်း၊ ကျောက်ခေတ်သစ်လို့ သတ်မှတ်ပါတယ်၊ ဂူအတွင်းပိုင်းကို ကြည့်နေရင်းနဲ့ ဘယ်ဖက် ဂူနံရံကိုလည်း မော့ကြည့်လိုက်ရော... ကျနော်အတွေ့ချင်ဆုံး အရာတွေကို တွေ့လိုက်ရတော့တယ်၊ နံရံဆေးရေး ပန်းချီ...၊


ဟုတ်ပါတယ်၊ စာတွေထဲမှာ ဖတ်ဖူး၊ မြင်ဖူးနေခဲ့တဲ့ ကျောက်ခေတ်လူရိုင်းတို့ရဲ့ ပန်းချီ၊ နွားသားအမိပုံ၊ ငါးပုံ၊ လက်ချောင်းပုံ၊ နေမင်းပုံ၊ သမင်ပုံ အစရှိသဖြင့်...၊ ဒါတွေကို ၁၀ ပေလောက်အမြင့်မှာ ဆွဲထားတယ်၊ ဆေးနီ ကိုသုံးပြီး တစ်ကြောင်းမျဉ်းနဲ့ ဆွဲထားတယ်၊ နံရံအောက်ခြေမှာ ပဲ့ကျနေတဲ့ ကျောက်တုံးအပိုင်းအစတွေ ရှိလို့ အဲဒီပေါ်တက်ပြီး ပန်းချီတွေကို အနီးကပ် ကြည့်ဖြစ်တယ်၊ နေဒဏ်လေဒဏ်ကြောင့် အတော့်ကို မှိန်နေပါပြီ၊ ကျနော့်ခေါင်းထက်မှာ အနီးဆုံးရှိနေတဲ့ ပုံလေးတစ်ပုံရဲ့ အနားစွန်းလေးကို လက်ညှိုးထိပ်နဲ့ ဖွဖွလေး ထိထား ကြည့်မိတယ်၊ ကျနော် ကြက်သီးမွှေးညှင်းတွေ ထ,သွားသလိုပဲ၊ ဒီပုံကို လွန်ခဲ့တဲ့ နှစ်တစ်သောင်းလောက်က ယောင်္ကျား၊ မိန်းမ၊ လူငယ်၊ လူကြီး ဘယ်သူမှန်းမသိနိုင်တဲ့ ကျောက်ခေတ်လူသားတစ်ယောက် ဆွဲသွားခဲ့တယ်၊ တစ်ယောက်ထက်လည်း ပိုချင်ပိုမယ်၊ အခု ကျနော်ရပ်နေတဲ့ နေရာမှာ ရပ်ကောင်း ရပ်နေခဲ့လိမ့်မယ်၊ ကျောက်ခေတ်သစ်ဆိုတော့ အဝတ်အစားက ဘယ်လိုဝတ်ကြလဲ၊ ဟောဟိုက အလယ်ခေါင်မှာ မီးဖိုကြီးတစ်ခု လည်း ရှိချင်ရှိမှာပေါ့၊ ဒီအထဲမှာ ဘယ်နှစ်ယောက်လောက်များ နေခဲ့ကြသလဲ၊ စာတွေ့သာ သိခဲ့ရတဲ့ လွန်ခဲ့ တဲ့ နှစ်တစ်သောင်းက ပုံရိပ်တွေကို အတွေးတွေနဲ့ ကျနော် လိုက်ဖမ်းနေမိတယ်၊ အကြာကြီးပါပဲ...၊ ကျနော် လူရိုင်းတို့ရဲ့ 'အိမ်' ကို တကယ်ပဲ ရောက်နေခဲ့ပြီ...၊


ဂူ ၁ မှာ တစ်နာရီကျော်လောက် နေပြီးမှ ကိုက် ၂၀၀ လောက်အကွာမှာ ရှိတဲ့ ဂူ ၂ ဖက်ကို ဆက်ထွက်လာ ခဲ့တယ်၊ အဲဒီ ဂူ ၂ အဝလည်းရောက်ရော... လူတွေ အများကြီး တွေ့လိုက်ရတယ်၊ ယောင်္ကျားတွေ၊ မိန်းမ တွေ၊ ကလေးငယ်တွေ...၊ မရှိဘူးဆိုရင်တောင် အနည်းဆုံးတော့ အယောက် ၂၀ ဝန်းကျင်ပဲ၊ ရုတ်တရက် ဆိုတော့ ကျနော်တို့လည်း လန့်သွားတယ်၊ ဒါပေမယ့် တော်သေးတယ်၊ ကျောက်ခေတ်လူသားတွေတော့ မဟုတ်လို့...၊ နောက်မှ သိရတာက သူတို့က သိပ်မဝေးတဲ့ ရွာကနေလာကြတာ၊ ရွာနာမည်က 'အရေးမဆို' ရွာတဲ့၊ အဲဒီရွာက ဘုန်းကြီးက ဒီဂူထဲမှာ လာပြီးတရားထိုင်တော့ သူတို့ကလည်း ဝေယျာဝစ္စ လုပ်ပေးရ အောင် လိုက်လာခဲ့ကြတာ၊ ကျနော်တို့ကိုလည်း သူတို့က အထူးအဆန်းလို ကြည့်လို့၊ တရားထိုင်ဖို့လည်း မဟုတ်၊ ဘာလည်းမဟုတ်နဲ့ ဒီအထိတောင်လာတယ် ဆိုတော့ နားမလည်နိုင်တဲ့ အကြည့်တွေနဲ့...၊ ဒါပေမယ့် ရိုးသားတဲ့ တောသူတောင်သားတွေပီပီ အင်မတန်ကို သဘောကောင်းကြတယ်၊ အဲဒီနေ့ ညစာကို ကျနော်တို့အတွက် သူတို့ကပဲ ချက်ပေးခဲ့တယ်၊


ဒီဂူ ၂ ကတော့ တော်တော်ကြီးပါတယ်၊ ပေ ၈၀၀ လောက်နက်ပြီးတော့ အထဲမှာလည်း ဂူအခန်းငယ်တွေ ၉ ခန်းတောင် ရှိတယ်၊ ဒါပေမယ့် နှစ်နေရာ၊ သုံးနေရာလောက်မှာ ဂူရဲ့အမိုးက ပေါက်နေတော့ အဲဒီကဝင်တဲ့ အလင်းနဲ့ အထဲမှာ အတော်အတန် လင်းပါတယ်၊ ဂူဝမှာ စေတီတစ်ဆူ တည်ထားတယ်၊ အထဲမှာတော့ ဂူအမိုးကနေ ကျောက်စက်ရေတွေ တစက်စက်နဲ့ စီးကျတဲ့ နေရာတွေ အများကြီးပဲ၊ ဒီရေတွေကြောင့် ကျောက်စက်ပန်းဆွဲနဲ့ ကျောက်စက်မိုးမျှော်တွေလည်း အများကြီးတွေ့ရတယ်၊ ဂူထဲမှာ စိမ့်ပြီးအေးနေတယ်၊ ဒီဂူထဲမှာတော့ ကျောက်ခေတ်လူသားတွေ နေခဲ့တဲ့ လက္ခဏာ မတွေ့ရဘူးလို့ ဆိုပါတယ်၊


'အရေးမဆို' ရွာသားတွေက ထမင်းချက်ပေးတော့ ကျနော်တို့နဲ့ လမ်းပြကြီးလည်း အေးအေးဆေးဆေး 'ရွှေသမင်' ဖမ်းထွက်နေ လိုက်တယ်၊ ပြီးတော့ မမှောင်ခင်မှာ ထမင်းအမြန်စားပြီး ညကို စောင့်နေလိုက် တယ်၊ သစ်ပင်ဝါးပင်တွေနဲ့မို့ ညနေစောင်းတာနဲ့ ညက ချက်ချင်းမှောင်သွားတယ်၊ ရွာသားတွေကိုလည်း ဖယောင်းတိုင်လေးတွေနဲ့ ခဏလားပဲ တွေ့လိုက်ရတယ်၊ အားလုံး အလျှိူအလျှိူ ပျောက်ကုန်ကြတယ်၊ အဲဒီမှာ ကျနော် ဒုက္ခရောက်တော့တာပဲ၊ ကျနော့်မှာ မီးခြစ်လည်းမရှိဘူး၊ ဖယောင်းတိုင်လည်း မရှိဘူး၊ အိပ်မယ့် နေရာကို ညနေက ကြည့်ထားတာ၊ အခုတော့ မမှတ်မိတော့ဘူး၊ ဒါနဲ့ ဂူအတွင်းထဲကို နဲနဲဝင်လိုက် ပြီး အမှောင်ထဲမှာ အကြာကြီး ရပ်နေလိုက်ရတယ်၊ မျက်စိက အမှောင်ကို ကျင့်သားရတော့မှ တရွေ့ရွေ့နဲ့ ဆက်ဝင်သွားပြီး ဘယ်ဖက်က ဂူအခန်းငယ်လေးဖက်ကို သွားလိုက်တယ်၊ ကျနော်မှတ်ထားခဲ့တာလည်း ဒီလိုနေရာပဲ၊ သေချာအောင် အသံခပ်အုပ်အုပ်နဲ့ ခေါ်ကြည့်တော့ ထွန်းထွန်းက ပြန်ထူးတယ်၊ သူ့မှာလည်း ဘာမီးမှ မရှိဘူး၊ ကိုပေါက်က ဒီလိုနေရာရောက်မှ ဒီအတိုင်းပြန်သွားရင် မတန်ဘူးဆိုပြီး ဂူအတွင်းထဲ ဝင်သွားပြီး တရားသွားထိုင်တယ်-တဲ့၊ လမ်းမှာတုန်းကတော့ အမဲလိုက်ချင်နေတာလည်း သူပဲ၊ ကိုစံခါးက ဓါတ်မီးယူပြီး အတွင်းထဲ သွားကြည့်နေတယ်၊ ဒါနဲ့ ကျနော် လည်း အိပ်ဖို့ဆုံးဖြတ်ပြီး မြေကြီးပေါ် ဟိုစမ်းဒီစမ်း လုပ်တော့ ထွန်းထွန်းရဲ့ ခြေထောက်ကို သွားဆွဲမိလို့ သူရော၊ ကျနော်ပါ လန့်သွားသေးတယ်၊ အထဲမှာက ကိုယ့်လက်ကို ကိုယ်မမြင်ရလောက်တဲ့အထိ ပိန်းပိတ် အောင်ကို မှောင်ပါတယ်၊ ကျနော့်လက်က ဝါးကပ်တစ်ချပ်ကို စမ်းမိတယ်၊ ဒါနဲ့ အဲဒီပေါ်မှာပဲ အပိုပါလာတဲ့ အင်္ကျီကိုခြုံပြီး အိပ်လိုက်ရတယ်၊ ကျနော် ထူးထူးဆန်းဆန်း ချက်ချင်းပဲ အိပ်ပျော်သွားတာ မိုးလင်းမှပဲ နိုးတော့တယ်၊


နောက်တစ်နေ့မနက် ရွာသားတွေကို နှုတ်ဆက်ပြီး ပြန်ထွက်တော့ နေတောင် အတော်မြင့်နေခဲ့ပြီ၊ အပြန်မှာ တော့ တောင်ကြောတွေ ပေါ်ကို တည့်တည့်တက်ရလို့ ပိုပင်ပန်းပါတယ်၊ ခေါင်းမူးပြီး အသက်ရှူမဝ ဖြစ်တာ ခဏခဏပဲ၊ ကိုစံခါး ယူလာတဲ့ ဂလူးကို့စ်အမှုန့်တွေကို ခပ်များများစားလိုက်မှ နဲနဲသက်သာတယ်၊ မွန်းတိမ်း ပိုင်းလောက် ရွာငံပြန်ရောက်တော့ လမ်းပြဦးလေးကြီးက သူ့အိမ်မှာ အမှတ်တရ ညစာ,စားဖို့ ကျနော်တို့ကို ဖိတ်လို့ သွားဖြစ်တယ်၊ ရွာမှာက တခြားစားသောက်ဆိုင် မရှိလို့ အတော်ပဲ ဖြစ်သွားတယ်၊ သူ့အမျိုးသမီးနဲ့ ကလေးနှစ်ယောက်ကပါ ကျနော်တို့အနား လာထိုင်ရင်း စကားတွေ ပြောဖြစ်ကြတယ်၊ ဖော်ရွေပြီး ချစ်စရာ ကောင်းတဲ့ မိသားစုလေးပါပဲ၊ အဲဒီညက အားလုံး ဗိုက်လေးလေးနဲ့ အိပ်လိုက်ကြတာ နောက်တစ်နေ့မနက် ၅ နာရီထွက် တဲ့ အောင်ပန်းကားကို လွတ်သွားတော့မလို့၊ တည်းခိုခန်းက လာနှိုးမှ ကျနော်တို့အားလုံး ကတိုက်ကရိုက်နဲ့ ဝုန်းဒိုင်းကြဲပြီး ထပြေးရတယ်၊ မျက်နှာတောင် မသစ်နိုင်ဘူး၊


ဒီပို့စ်လေးကို ရေးနေရင်းနဲ့ကို ဒီအကြောင်းတွေက တကယ်ပဲ ဖြစ်ခဲ့တာလားလို့ ခဏခဏ တွေးနေမိသေး တယ်၊ တချို့အဖြစ်အပျက်တွေက ပြက်ပြက်ထင်ထင် မှတ်မိနေသလောက် တချို့ဟာတွေကိုတော့ အတော် လေးကို စဉ်းစားယူရပါတယ်၊ အဲဒီတုန်းက ရိုက်ခဲ့တဲ့ ဓါတ်ပုံတွေနဲ့ ဂူမြေပုံကြမ်းကတော့ ရန်ကုန်မှာပဲ ကျန်နေခဲ့ပြီ၊ တချို့လူတွေက လွန်ခဲ့တဲ့ နှစ်ပေါင်း ၂၈၀၀ လောက်က ထွန်းကားခဲ့တဲ့ ဂရိတို့ရဲ့ ယဉ်ကျေးမှုဆီ ကို သွားလည် ကြတယ်၊ တချို့က နှစ်ပေါင်း ၅၀၀၀ လောက်က တည်ဆောက်ခဲ့တဲ့ အီဂျစ်တို့ရဲ့ အံ့မခန်း ပိရမစ်တွေဆီကို သွားလည်ကြတယ်၊ ကျနော်ကတော့ လွန်ခဲ့တဲ့ နှစ်ပေါင်း ၁၀,၀၀၀ လောက်က ဆွဲခဲ့တဲ့ တစ်ကြောင်းမျဉ်း နံရံပန်းချီလေးတွေကို ကြည့်ဖို့ လူရိုင်းတို့ရဲ့ အရပ်ကို အလည်သွားခဲ့ဖူးပါတယ်...။ ။



ညီလင်းသစ်
၆ ဖေဖော်ဝါရီ၊ ၂၀၁၁

02 February 2011

သူ့ကို ပြောပြီးပြီလား


ဒီနေ့ နေ့လယ်စာကို ကင်န်တင်းမှာ Jean-David နဲ့ စားဖြစ်ပါတယ်၊ ဒီလူက ကျနော်နဲ့ လုပ်ဖော်ကိုင်ဖက် တစ်ယောက်ပါ၊ ကျနော့်အလုပ်မှာ လူအချို့က နားနေခန်းထဲမှာ အိမ်ကယူလာတဲ့ဟာ တစ်ခုခု စားကြသလို တချို့ကလည်း အလုပ်စားပွဲမှာပဲ ဆင်းဒဝစ်ခ်ျလိုမျိုး တစ်ခုခု စားတတ်ကြတယ်၊ ကင်န်တင်းမှာ စားတဲ့သူဆိုလို့ အများဆုံးက ကျနော်နဲ့သူပဲ ရှိပါတယ်၊ အဲဒီမှာ သူကပြောတယ်...၊

မနေ့ညက သူ့သားလေးက သူ့ကိုပြုံးပြီး စိုက်ကြည့်နေတယ်-တဲ့၊ ဒါနဲ့ သူက “ဘာပြုံးတာလဲကွ” လို့ လှမ်းမေးလိုက်တော့ ၇ နှစ်အရွယ် အဲဒီကလေးက “အင်း..အဖေ့လိုလူကို အဖေအဖြစ်ရထားတာ သားတော့ ကံကောင်းတာပဲ”လို့ ပြန်ပြောတယ်-တဲ့၊ ဒါကို ပြောနေတဲ့ သူ့မျက်နှာမှာ ပီတိတွေနဲ့ တဖိတ်ဖိတ်လက်လို့...၊ ကျနော်က သူ့ကို “ဒါ အဖေတစ်ယောက်အတွက် အင်မတန်လှတဲ့ ချီးမွမ်းစကားလေးပဲ” လို့ စကားထောက် ပေးလိုက်တယ်၊ တဆက်ထဲ “ကျနော်လည်း အဲဒီလိုစကားမျိုး မနေ့ညကပဲ လက်ဆောင်ရလိုက်တယ်ဗျ”လို့ ကျနော့်အဖြစ်ကိုပါ ပြန်ပြောဖြစ်တယ်၊ ဟုတ်ပါတယ်..၊ တိုက်တိုက်ဆိုင်ဆိုင် မနေ့ညက သားကလေးက ကျနော့်ကို အဖေတိုင်းကြားချင်ကြမယ့် စကားလေးတစ်ခွန်း ပြောတယ်၊

“ ပါပါး... ပါပါးက သားသားရဲ့ အသဲတုံးကြီး ” တဲ့....၊

အေးလွန်းလို့ ရေတောင်ခဲနေတဲ့ ရာသီမှာ ကျနော် တထိုင်တည်း အရည်ပျော်သွားတယ်၊ ပြီးတော့ သူက အဲဒီစကားကို မြန်မာလို ပြောလိုက်တာ...၊ အမှန်တော့ သူက ကျနော့်ရဲ့ လက်သုံးစကားကိုယူပြီး ငါးကြင်းဆီနဲ့ ငါးကြင်းကြော်လိုက်တာပါ၊ သား ငယ်ငယ်တုန်းက ဝဝကစ်ကစ်လေးဆိုတော့ ကျနော်ကသူ့ကို “ပါပါးရဲ့ အသဲတုံးကြီး”လို့ မကြာခဏ ခေါ်လေ့ ရှိခဲ့တယ်၊ အခုသူက အဲဒီစကားကိုပဲ subject နဲ့ object ကို ပြောင်းပြန်လှန်ပြီး ပြန်ပြောတာ....၊ ဒီစကား ဘာ့ကြောင့်ပြောတာလဲ ဆိုတဲ့ နောက်ကွယ်ဇတ်လမ်းကဒီလို..၊

မနေ့ညက ၉ နာရီလောက် ကျနော်အိမ်ပြန်ရောက်တော့ သားကို သူ့အမေက သိပ်ထားနှင့်ပြီ၊ ဒါပေမယ့် သားက နဲနဲကြီးလာတော့ ၈ နာရီခွဲမှာ သိပ်လေ့ရှိပေမယ့် ၉ နာရီခွဲလောက်မှ အိပ်ပျော်ချင်ပျော်တာ...၊ အဲဒါ ကျနော့်ရဲ့အသံကြားတော့ သူက ပြေးထွက်လာတယ်၊ သူ့အမေက “ဟင်,ကြည့်စမ်း...အိပ်ရာထဲရောက်ရင် ပြန်မထရဘူးဆိုတာ... ...”လို့ စကားတောင် မဆုံးသေးဘူး သူက “မဟုတ်ဘူး၊ ပါပါးကို ကြိုမလို့”လို့ ပြောလည်းပြော၊ ကျနော့်ပေါ်ကိုလည်း ခုန်တက်လိုက်တယ်၊ ကျနော်က ပြန်ပွေ့ချီလိုက်တာ မြင်တော့ သူ့အမေက မျက်စောင်းတချက်ထိုးပြီး ဘာမှ ဆက်မပြောတော့ဘူး၊ သိပ်မကြိုက်ပေမယ့် ဒီဇတ်ကို ကျနော်ဆက်က ဆိုတဲ့သဘောနဲ့ လွှတ်လိုက်တာပါပဲ၊

ဒါနဲ့ ကျနော်လည်း သားကို အိပ်ရာထဲပြန်ပို့ရင်း ပုံပြင်တစ်ပုဒ် ပြောပြလိုက်ရတယ်၊ တကယ်ဆို သူ့အမေက လည်း ပုံပြောပြထား ပြီးသားပါ၊ ဒါနဲ့တင် မပြီးသေးဘူး၊ သူ့ကို သီချင်းဆို သိပ်ပါဦး ဆိုလို့  ကျနော်လည်း “မိတ္ထီလာကန်တော်အောက်မှာ ကြောင်ကြီးရဲ့ မြီးတံတို” လိုက်ရပြန်တယ်၊ ဒါလည်း မဟုတ်သေးပြန်ဘူး၊ သီချင်းဆုံးတော့ ဆရာလေးက သူနဲ့ ၅ မိနစ် နေပါဦးဆိုလို့ ကုတင်ဘေးမှာ ထိုင်နေရပြန်ရော...၊ ဒါပေမယ့် သူက တော်တော်နဲ့ အိပ်မယ့်ပုံမရှိတော့ ကျနော်က “ကဲ..သားရေ၊ ဒီလောက်ဆို တော်ပြီနော်၊ ပါပါး ဘာမှလည်း မစားရသေးဘူးကွ”ဆိုပြီး ထမယ် အလုပ်မှာ သူက အဲဒီစကား လှမ်းပြောလိုက်တာပါ၊ သားက ၃ နှစ်ခွဲပေမယ့် ကြိုးကွင်းပစ်နည်း ကောင်းကောင်း တတ်နေပါပြီ၊ ကျနော် တခါထဲ ဖင်ထိုင်ရက်ပြန်ကျတယ်၊ အဲဒီမှာတင် နောက်ထပ် ၃ မိနစ်လောက် ထပ်ကြာသွားသေးတယ်၊ လူလည်လေး... ...၊

ကျနော့်စကားဆုံးတော့ Jean-David က ကလေးတွေအနေနဲ့ ဒီလိုမျိုး ခံစားမှုကို express လုပ်တာဟာ ကောင်းကြောင်း၊ သူနဲ့ သူ့မိဘတွေကြားမှာ ဒီလိုမျိုး ဘာမှပြောလေ့ မရှိခဲ့ကြောင်း မှတ်ချက်ချတယ်၊ ကျနော် ကျတော့ရော...၊ ကျနော်လည်း မှတ်မိသလောက်တော့ အဖေအမေနဲ့ ဒီလိုမျိုး ပြောလေ့ မရှိဘူး၊ သူတို့ ကျနော်တို့ မောင်နှမတွေကို ပြောမပြတတ်အောင် ချစ်တာတော့ ယုံမှားသံသယ စိုးစဉ်းမျှ မရှိပါဘူး၊ ကျနော် ဆိုလိုတာက ချစ်ခြင်းဟာ စကားလုံးတွေအဖြစ် မစီးဆင်းခဲ့ဘူး ဆိုတာ သက်သက်ပါ၊ တခြား မိဘနဲ့ သားသမီးတွေ ကြားမှာကော၊ “ချစ်တယ်”ဆိုတာ ပြောဖူးသလား၊ ပြောတတ်ကြသလား၊ ဒါဟာ ကျနော်တို့ ကြီးပြင်းခဲ့ကြတဲ့ မျိုးဆက်နဲ့ ဆိုင်မလား၊ ဒါမှမဟုတ် ဓလေ့ထုံးစံ ကိစ္စ တစ်ခုသက်သက်ပဲလား၊ တကယ်တော့ ချစ်တယ် ဆိုတဲ့ စကားလေး တစ်ခွန်းဟာလည်း အသိအမှတ်ပြုမှု တခုပဲ မဟုတ်လား...၊

ကျနော်တို့ အဖေနှစ်ယောက် အတွက်တော့ မနေ့ညက မြစ်ဖျားခံလာတဲ့ ပီတိမြစ်က ဒီနေ့,နေ့လယ် ထမင်းစားပွဲပေါ် အထိ စီးတုန်း... ...။ ။


ညီလင်းသစ်
၂ ဖေဖော်ဝါရီ၊ ၂၀၁၁