ဒီဇင်ဘာရဲ့ သီချင်း

ဟိုတစ်နေ့က နှင်းတွေ သိပ်သိပ်သည်းသည်းကို ကျတယ်၊ ဒီဇင်ဘာလ စကတည်းက ဟိုတစ်ရက်၊ ဒီတစ်ရက် ဆိုသလို ကြိုကြားကြိုကြား ခပ်ဖွဲဖွဲလေး ကျနေပေမယ့် ဒီတစ်ခါတော့ အဆုပ်လိုက်၊ အခဲလိုက်ကို တစ်ညလုံး ကျနေခဲ့တာ...၊ မှန်ပြူတင်းက ကြည့်တော့ ဆိုဒီယမ်လမ်းမီးတိုင်တွေရဲ့ ဝါကျင့်ကျင့် အလင်းအောက်မှာ နှင်းဆုပ်တွေက ဖွေးကနဲ၊ ဖွေးကနဲနဲ့ မရပ်မနားပဲ...၊ မိုးလင်းတော့ မြင်မြင်သမျှ ဝန်းကျင်တစ်ခုလုံးက ပကတိ အဖြူရောင်သက်သက် အောက်မှာ တိတ်ဆိတ်ငြိမ်သက်လို့...၊

ဒီဇင်ဘာဟာ အဲဒီလို အဖြူရောင်အောက်မှာ ရှိနေတတ်သလို မှိုင်းညို့ညို့ တိမ်စိုင်တွေအောက်မှာလည်း ရုတ်တရက် ငိုချလိုက်တော့မယ့် မိန်းမပျိုတစ်ယောက်လို တခါတလေ ညှိုးငယ်ချင် ညှိုးငယ်နေတတ် ပါသေးတယ်၊

ဒီနေ့ နေ့လယ်က အနောက်ဥရောပရဲ့ ကုန်းတွင်းပင်လယ်လို့ တင်စားကြတဲ့ ရေကန်စပ်မှာရပ်ရင်း တစ်ဖက်ကမ်းက တောင်တန်းတွေကို ကျနော် ငေးကြည့်နေဖြစ်တယ်၊ အဲဒီနှင်းဖုံး တောင်တန်းတွေရဲ့ ဟိုးတစ်ဖက်မှာ မွေးဖွားကြီးပြင်းခဲ့ရာ ဇာတိရပ်ရွာ တစ်ခုရှိတယ်၊ မောင်နှမတွေ အများကြီးရှိတယ်၊ အမေနဲ့အဖေ ရှိတယ်၊ သူငယ်ချင်းတွေ ရှိတယ်၊ ဝိုင်ဝိုင်းကတော့ 'အိမ်လွမ်းသူ' ထဲမှာ ဒီပင်လယ်ကြီးရဲ့ ဟိုးတစ်ဖက်ကမ်း၊ ငါလှမ်းရင်း မှန်းမျှော်ဆဲ...တဲ့၊ ကျနော်ကတော့ မှိုင်းညို့ညို့ ဒီဇင်ဘာ နေ့လယ်ခင်းတစ်ခုထဲ ကုန်းတွင်းပင်လယ်ရဲ့ ကမ်းစပ်မှာ မလှုပ်မယှက်...၊

ဘယ်လိုပုံစံနဲ့ပဲ ရှိနေပါစေ...၊ ဒီဇင်ဘာရဲ့ မြေပေါ်က နှင်းဆုပ်နှင်းခဲတွေ၊ လေထဲမှာ ပျံ့လွင့်နေတဲ့ ခရစ်စမတ်တေးသံတွေ၊ လမ်းမတွေထက်က ရောင်စုံ မီးဆိုင်း၊ မီးပုံးတွေ အောက်မှာ သီချင်းလေးတစ်ပုဒ်က ကျနော့်ရင်ထဲကို အမြဲ ရောက်လာလေ့ ရှိပါတယ်၊ တစ်နှစ်ပတ်လုံး အခြား အချိန်တွေမှာသာ မေ့ချင် မေ့နေမယ်၊ ဒီဇင်ဘာရောက်ရင်တော့ သတိတရနဲ့ အမြဲလိုလို ဆိုညည်းဖြစ်တဲ့ သီချင်းကလေးပါပဲ၊ လွန်ခဲ့တဲ့ ၂ နှစ်တုန်း ကတော့ ဒီသီချင်းကလေးကိုပဲ ဗီဒီယိုကလစ်လေး တစ်ခုလုပ်ခဲ့ ဖူးသေးတယ်၊ နှင်းတွေ သိပ်သိပ်သည်းသည်း ကျနေတာကို မှန်ပြူတင်းကနေ ကြည့်ရင်း ဒီဇင်ဘာအလွမ်းက ကြိုးခြောက်ချောင်းကနေတဆင့် ရင်ဘတ် တစ်ခုလုံးကို တစ်ရစ်ချင်း၊ တစ်ထစ်ချင်း ခပ်တင်းတင်းကို တုပ်နှောင်သွားခဲ့ တော့တယ်...။

ညီလင်းသစ်
၁၇ ဒီဇင်ဘာ၊ ၂၀၁၂